Ռազմական ոստիկանության օպերլիազորը ոչ սթափ վիճակում՝ ավտովթարի պատճառ. կան վիրավորներ (լուսանկարներ)
Երեկ՝ հունվարի 22-ին, ավտովթար է տեղի ունեցել Երևանում: Ժամը 23:20-ի սահմաններում Չարենցի փողոցի բնակիչ` 28-ամյա Տիգրան Հարությունյանը` վարելով «Վազ 21 723» մակնիշի 222 ՕP 12 համարանիշի ավտոմեքենան, բախվել է Փափազյան փողոցի բնակիչ` 48-ամյա Վահան Բոյաջյանի վարած «Վազ 21 099» մակնիշի 01 SՍ 070 համարանիշի ավտոմեքենային: Այս մասին հաղորդում է shamshyan.com կայքը:
Ինչպես հայտնում է ֆոտոլրագրող Գագիկ Շամշյանը, վթարի հետևանքով 2 ավտոմեքենաների վարորդները և «Վազ 21 723» -ի ուղևոր` Մոսկովյան փողոցի բնակիչ` 27-ամյա Նազիկ Փնջոյանը, մարմնական վնասվածքներով տեղափոխվել են Միքայելյանի անվան վիրաբուժական հիվանդանոց:
Տ. Հարությունյանը աշխատում է ՀՀ Պաշտպանության նախարարության ռազմական ոստիկանության Երևան քաղաքի կայազորում՝ որպես օպերլիազոր: Նա կոչումով լեյտենանտ է: Տ. Հարությունյանը ենթարկվել է բժշկական փորձաքննության և պարզվել է, որ ավտոմեքենան վարել է ոչ սթափ վիճակում:
