ՀՀ նախագահի իրավազրկված թեկնածուի նամակ-դիմումը

«Մարդու իրավունքների պաշտպան միջազգային կառույցներին, հայ ժողովրդին, ՀՀ ազատ կամքի դրսևորմամբ ահաբեկված քվեատուին, քարոզարշավին մասնակցող նախագահի թեկնածուներին, ՀՀ գործող Նախագահին, ՀՀ ԱԺ-ին, ՀՀ Սահմանադրական դատարանին, ՀՀ գլխավոր դատախազին, ՀՀ ազատ ԶԼՄ-ներին,

ՀՀ իրավազրկված (հանիրավի) քաղաքացի, ՀՀ նախագահի խոչընդոտված թեկնածու Պավլիկ Վասպուրի Սարգսյանից`

Բաց նամակ-դիմում

Օգտվելով ՀՀ Սահմանադրություն 1-6, 14, 14.1, 18, 19, 27, 27.1, 47, 49, 50, 52, 100- կետ 4, 101- կետ 9, 102, 117- կետ 1, 114 հոդվածներից՝ ՀՀ-ում, ՀՀ նախագահի ընտրությունների հետ կապված, ՀՀ գործող նախագահի, օրենսդիր և գործադիր իշխանությունների, իրավապահ և օրինապահ մարմինների, ոչ ազատ ուղղորդված ԶԼՄ-ների, ինչպես նաև՝ իրենց ընդդիմադիր հայտարարած ուժերի կողմից համատեղ ծրագրավորված և իրականացված քաղաքական դաշտի ամայացումը` վակուումը, և ներկա նախընտրական իրավիճակը, սպառնում է, Հռչակագրի հիմքերով ստեղծված, ՀՀ Սահմանադրական կարգի տապալում իրենց իսկ կողմից, որը չկանխելու դեպքում՝ ՀՀ-ում կիշխի քաղաքական, տոտալիտար օլիգարխիկ խունտան։

Նշված իրավիճակից դուրս գալու նպատակով՝ առաջարկում եմ.

1. Կասեցնել (սառեցնել) ՀՀ նախագահի ընտրությունները։

2. Դատական կարգով, հրապարակայնորեն, հավասար պայմաններում վիճարկել ստեղծված իրավիճակը։ Ինձ համար ցանկալի արդյունքը կլիներ իմ տեսակետների սխալ լինելու արդարացի, իրավացի ապացույցը։

3. Եթե իմ առաջարկությունը հակասահմանադրական է, գործ հարուցել իմ դեմ՝ սահմանադրական իրավունքը խախտելու մեղադրանքով, և դատարանի արդարացի, անկախ, վճռով սահմանված պատիժը ես կընդունեմ՝ որպես պարգև, և հպարտորեն կկրեմ այն։

4. Այլ պարագայում՝ ես ինքս, ինքնամեղադրանքով կդիմեմ անկախ միջազգային կամ այլ երկրի դատարան, որը ՀՀ միջազգային պայմանագրերի, մարդու իրավունքների միջազգային նորմերի և ՀՀ Սահմանադրության համաձայն՝ ունի այդ իրավունքը` պաշտպանություն ընտրելով մարդու իրավունքների և ազատությունների Հելսինկյան կոմիտեն։

Ես չունեմ անձնական թշնամիներ։ Չեմ պատկանում որևէ քաղաքական կազմակերպության։ Չեմ կատարում որևիցե մեկի հանձնարարությունը։ Ես իրականացնում եմ իմ քաղաքացիական, սահմանադրական իրավունքը։

Անձիս և ընտանիքիս ազատության, կյանքի և իրավունքի անվտանգության երաշխավորն ինձ համար ՀՀ Սահմանադրությունը և հայ ժողովուրդն են։

Աղոթում եմ Աստծուն՝ մեզ բոլորիս պարգևել ողջախոհություն՝ հանուն Հայաստանի ապագայի։

Կեցցե՛ հայ ժողովուրդը։ Աստված մեզ պահապան։ Փա՜ռք Աստծո»։

Պավլիկ Սարգսյան
22.01.2013թ.