Բադրի Բիցաձեն վերադարձել է Վրաստան
Новости-Грузия-ի փոխանցմամբ՝ Վրաստանի Սահմանապահ ոստիկանության նախկին ղեկավար, Նինո Բուրջանաձեի ամուսին Բադրի Բիցաձեն Մյունխենից վերադարձել է հայրենիք: 2012 թվականի դեկտեմբերի 5-ին Վրաստանի խորհրդարանը նրան ճանաչեց որպես քաղաքական հալածյալ:
Բիցաձեն հանդիսանում է «Դեմոկրատական շարժում – Միասնական Վրաստան» կուսակցության առաջնորդներից մեկը, որը գլխավորում է նրա կին Նինո Բուրջանաձեն: Բիցաձեն Վրաստանը լքել էր 2011 թվականի մայիսին, իսկ նույն տարվա օգոստոսին հեռակա կարգով դատապարտվել էր ազատազրկման՝ ոստիկանությանը դիմակայելու կազմակերպման համար:
2013 թվականի հունվարին Վրաստանի գլխավոր դատախազությունը նրա վրայից հանել էր բոլոր մեղադրանքները և «Համաներման մասին» օրենքով համաներվել էր:
