Թուրքիայում պայթեցվել է Իրաքից եկող նավթամուղը
Թուրքական Star թերթի փոխանցմամբ՝ երեկ Թուրքիայում պայթեցվել է «Քիրքուք-Յումուրթալըք» (Ջեյհան) նավթամուղը: Միջադեպը գրանցվել է տեղական ժամանակով ժամը 22.30-ին, Մարդին նահանգի տարածքում:
Պայթյունի հետևանքով ժամանակավորապես դադարեցվել է տվյալ խողովակաշարով Իրաքից Թուրքիա նավթի մատակարարումը: Նախնական տվյալներով՝ պայթյունն իրականացրել են Թուրքիայում ահաբեկչական հռչակված ու արգելված «Քրդստանի աշխատավորական» կուսակցության (PKK) մարտիկները:
Հիշեցնենք, որ թեև «Քիրքուք-Յումուրթալըք» (Ջեյհան) նավթամուղն ունակ է օրական փոխադրել 1.6 միլիոն բարել նավթ՝ ներկայումս այն փոխադրում է օրական ընդամենը 900.000 բարել նավթ: Այս խողովակաշարը մշտապես գտնվում է PKK-ի թիրախում և բազմիցս պայթեցվել է նրա մարտիկների կողմից:
