Իրանն Իսրայելին լրտեսում է Սիրիայում տեղակայած երկու կայանների միջոցով
NEWSru.co.il-ի փոխանցմամբ՝ Իրանը Սիրիայում տեղակայել է երկու կայան, որոնք իրականացնում են Իսրայելին գաղտնալսելու և էլեկտրոնային տեղեկատվություն հավաքելու աշխատանքներ: Այս մասին նշված է ԱՄՆ պաշտպանության նախարարության պատրաստած հատուկ զեկույցում:
Դրանում ասվում է, որ այդ կայաններից մեկը տեղադրված է Սիրիայի հյուսիսային հատվածում, իսկ մյուսը՝ Գոլանի բարձունքների սիրիական հատվածում: Այդ կայանները 2006 թվականին տեղադրել է Իսլամական հեղափոխության պահակազորը, ինչին աջակցել է սիրիական վարչակարգը:
Այդ կայանները սպասարկում են իրանցի մասնագետները, որոնք տեղեկատվություն են հավաքում լիբանյական «Հըզբոլլահ» կազմակերպության համար: Իրանը պլանավորել է ավելացնել Սիրիայի տարածքում այդպիսի կայանների քանակը: Դա մասնավորապես վերաբերում է Սիրիայի հյուսիսային հատվածին, այդ թվում նաև՝ Սիրիայի միջերկրածովյան հատվածին:
