ՆԱՏՕ-ն ռազմական գործողությունների հրամանատարությունը գարնանը կհանձնի Աֆղանստանին
Ռուսական ИТАР-ТАСС լրատվական գործակալության փոխանցմամբ՝ Աֆղանստանում գործող Անվտանգության աջակցման միջազգային ուժերը (ISAF) սկսելու են իրականացնել օժանդակ գործառույթներ՝ արդեն այս գարնանը մարտական գործողությունների հրամանատարությունը հանձնելով աֆղանական ազգային բանակին: Այդ գործընթացը տեղի կունենա պլանավորվածից մի քանի ամիս շուտ:
Այս մասին հայտարարվել է Սպիտակ տանը ԱՄՆ և Աֆղանստանի նախագահներ Բարաք Օբամայի և Համիդ Քարզայի միջև անցկացված բանակցությունների արդյունքներով: Դրանում նաև նշված է, որ ամռանը պետք է սկսվի կոալիցիոն ուժերի կողմից աֆղանական բանակին ու հատուկ ծառայություններին Աֆղանստանի անվտանգության պատասխանատվության հանձնման վերջին փուլը: Դրա ստույգ ժամկետը համաձայնեցվելու է ՆԱՏՕ-ի ու Աֆղանստանի կառավարության միջև:
Ներկայումս Աֆղանստանի զինված ուժերն իրականացնում են հակաահաբեկչական օպերացիաների 80 տոկոսի հրամանատարությունը, իսկ փետրվարին այդ ցուցանիշը կհասնի 90 տոկոսի: Պլանավորված է, որ ԱՄՆ-ի ու ՆԱՏՕ-ի ուժերը Աֆղանստանը լքելու են երկու տարվա ընթացքում:
