Հարուստ եղվարդցիները. մամուլ
«Եղվարդ քաղաքի հենց սկզբնամասում են գտնվում բնապահպանության նախարար Արամ Հարությունյանին պատկանող գազալցակայնը և բենզալցակայանը: Համենայնդեպս, այս օբյեկտները ցույց տալիս «Ժամանակին» այդպես ասացին եղվարդցիները»,- գրում է «Ժամանակ» օրաթերթը և շարունակում.
«Հիշեցնենք, որ Ա. Հարությունյանը ծնունդով Եղվարդից է և 1999 թ. այդ շրջանից պատգամավոր է դարձել: Եղվարդը Երևանին մոտ փոքր քաղաք է, որտեղ տարածքներ ու հսկայական առանձնատներ ունեն ՀՀ բազմաթիվ բարձրաստիճան պաշտոնյաներ:
Եղվարդցիներն ասում են, որ իրենց քաղաքը բաժանված է մի քանի մասի. մի մասը պատկանում է Ա. Հարությունյանին, մյուս մասը` Պետեկամուտների կոմիտեի նախագահ Գագիկ Խաչատրյանին, ով այնտեղ նույնպես տուն և հսկայական տարածքներ ունի: Մի մասն էլ պատկանում է իրենց հանրապետական քաղաքապետ Նորայր Սարգսյանին: Այնտեղ խոշոր առանձնատուն ունի նաև ՀՀ Կենտրոնական բանկի նախագահ Արթուր Ջավադյանը»:
