Ջհանգիրյանների գանգատների գործերով հարցեր են ուղղվել կառավարությանը
Մարդու իրավունքների եվրոպական դատարանը սկսել է ՀՀ նախկին զինդատախազ Գագիկ Ջհանգիրյանի և նրա եղբայր Վարդան Ջհանգիրյանի գանգատների քննությունը, ՄԻԵԴ-ը հարցեր է ուղղել կառավարությանը:
«Փաստինֆո»-ի թղթակցի հետ զրույցում գանգատաբերների ներկայացուցիչ Արա Ղազարյանը գոհունակություն է հայտնել, որ Գագիկ Ջհանգիրյանի գանգատի մասով Եվրադատարանը հարց է ուղղել Մարդու իրավունքների եվրոպական կոնվենցիայի 14-րդ հոդվածով՝ անկախ քաղաքական համոզմունքից խտրականության արգելում, խախտման վերաբերյալ:
Գագիկ և Վարդան Ջհանգիրյանների գանգատներն առնչում են 2008թ. ՀՀ նախագահական ընտրությունների շրջանում նրանց ոստիկանություն բերման ենթարկելու, ձերբակալելու, կալանավորելու, նրանց դեմ հարուցված գործերի քննությանը:
Ընդդեմ Հայաստանի Հանրապետության գանգատներում (երեք գանգատներից երկուսը միավորվել են մեկ վարույթում) Գագիկ Ջհանգիրյանը ներկայացնում է Կոնվենցիայի թվով 8՝ 2-րդ, 3-րդ, 5-րդ, 6-րդ, 10-րդ, 11-րդ, 14-րդ, 18-րդ հոդվածներով խախտումները՝ կյանքի իրավունք, խոշտանգումների արգելում, ազատության և անձեռնմխելիության, արդար դատաքննության իրավունքներ, արտահայտվելու, հավաքների ու միավորման ազատություն, խտրականության արգելում, իրավունքների նկատմամբ սահմանափակումների կիրառման սահմանները:
Իսկ Վարդան Ջհանգիրյանի երկու գանգատներում, որոնք միավորվել են մեկ վարույթում, բարձրացվում են Կոնվենցիայի 3-րդ, 5-րդ և 13-րդ հոդվածների՝ խոշտանգումների արգելում, ազատության և անձնական անձեռնմխելիության իրավունք, իրավական պաշտպանության արդյունավետ միջոցի իրավունք, խախտումների հարցերը:
