Իրանը ողջունել է Պենտագոնի ղեկավարի պաշտոնում Չակ Հեյգելի թեկնածության առաջադրումը
Ամերիկյան Associated Press լրատվական գործակալության փոխանցմամբ՝ Իրանը ողջունել է Պենտագոնի ղեկավարի պաշտոնում նախկին սենատոր, հանրապետական Չակ Հեյգելի թեկնածության առաջադրումը: Այս մասին այսօր հայտարարել է Իրանի ԱԳՆ-ի պաշտոնական ներկայացուցիչ Ռամին Մեհմանպարաստը:
Վերջինիս խոսքերով՝ Պենտագոնի ղեկավարի պաշտոնում Չակ Հեյգելի նշանակումը կարող է նպաստել Թեհրանի ու Վաշինգտոնի միջև հարաբերությունների կարգավորմանը: Մեհմանպարաստը նկատել է նաև, որ Հեյգելի նշանակումը կարող է գործնական փոփոխություններ առաջացնել ԱՄՆ արտաքին քաղաքականությունում:
Իրանցի դիվանագետը հավելել է, որ Իրանը նույնպես կարող է փոխել իր դիրքորոշումն ԱՄՆ-ի հանդեպ, եթե նա հարգի իր իրավունքները: Նշվում է, որ 66-ամյա Հեյգելը վիետնամական պատերազմի վետերան է և վերջին տարիներին աշխատել է Ջորջթաունի համալսարանում:
