Սե’րժը պիտի ներողություն խնդրի Մհերից. մամուլ
«Հայկական Ժամանակ» օրաթերթը գրում է. «Նախօրեին Մհեր Սեդրակյանի (Թոխմախի Մհեր) կողմից լրագրող Մհեր Արշակյանի «ծնոտը կոտրելու» սպառնալիքի դեպքն արտառոց պետք չէ համարել` հաշվի առնելով, որ այդ պատգամավորը Հանրապետական կոաակցությունից է, այս կուսակցության համար լրագրողներին սպռանալն ու հայհոյելը նորություն չէ:
2006-ին Սերժ Սարգսյանի եղբայր Սաշիկ Սարգսյանը հայհոյել էր «Իրավունք» թերթի թղթակից Թագուհի Թովմասյանին, նաև սպառնացել, թե նրա «վերջը լավ չի լինի»: «Դու գիտես, չէ՞, ես ով են»,- սպառնացել էր այն ժամանակվա պաշտպանության նախարարի եղբայրը:
Նույն Սաշիկ Սարգսյանը 2011թ. մայիսի 16-ին հարձակվել էր «Հրապարակ» թերթի թղթակից Մարինե Խառատյանի վրա: Այս անգամ ագրեսիայի պատճառը լրագրողի հարցն էր այն մասին, թե պատրաստվու՞մ է, արդյոք, Սարգսյանն առաջադրվել Աժ ընտրություններին: Աաշիկ Սարգսյանը նաև հայհոյել էր լրագրողին:
2009թ. Երևանի ավագանու ընտրությունների օրը լրագրողների նկատմամբ իր հատուկ վերաբերմունքն էր դրսևորել հանրապետական Լևոն Սարգսյանը (Ալրաղացի Լյով), իր թիկնապահների օգնությամբ: Նրանք բռնություն էին գործադրել«Չորրորդ Իշխանություն» թերթի լրագրող Գոհար Վեզիրյանի, «Հայք» թերթի լրագրող Տաթև Մեսրոպյանի և «ժամանակ» թերթի լրագրող Մարինե Խառատյանի նկատմամբ, վերջինից նաև խլել ձայնագրիչը:
Այս տարվա նոյեմբերի 27-ին ֆոտոլրագրող Գագիկ Շամշյանին հայհոյել և սպառնացել էր մեկ այլ ՀՀԿ-ական Նահապետ Գևորգյանը (Նովո), ասելով` սատկացնելու եմ:
2011թ.-ին ՀՀԿ-ական Ռուբեն Հայրապետյանը (Նեմեց Ռուբո) վիրավորել և հայհոյել էր «Հետքի» լրագրող Գրիշա Բալասանյանին: Վերջինս զանգահարել էր արդեն նախկին պատգամավորին` տեղեկանալու, թե ինչ բարոյական վնաս է կրել «Հայկական ժամանակ» օրաթերթի հրապարակումից հետո, որին վերջինս դատի էր տվել: Հայրապետյանը լրագրողին անվանել էր «տգետ» և սեռական բնույթի հայհոյանքներ տվել: Ռուբեն Հայրապետյանն ամիսներ առաջ նաև հարվածել էր լրագրող, իրավապաշտպան Արման Վեզիրյանին:
Նմանօրինակ «հանրապետական» իրադարձությունների թվարկումը կարելի է շարունակել, սակայն ամենազավեշտալին ու դիպուկը, թերևս, նոյեմբերի 13-ին «France 3» հեռուստաալիքի թղթակից Օլիվիե Միշելին ուղղված` «Աերժ Սարգսյանի նախարարներից» մեկի սպառնալիքն էր: Ֆրանսիացի լրագրողը Սերժ Սարգսյանին հարցրել էր Հայաստանում կոռուպցիայի մասին, որից հետո հայ նախարարներից մեկը մատով սպառնացել էր նրան: Ստացվում է, որ սպառնալիքներն ու վիրավորանքը երկրի ներսում փորձարկելուց հետո Սարգսյանի իշխանությունն իներցիայով դա կիրառում է նաև քաղաքակիրթ Եվրոպայում: Իսկ ներսում բազմաթիվ չհնչած սպառնալիքներ լրագրողների նկատմամբ` կոնկրետ բռնությունների և ծեծի են վերածվել, մինչ օրս մնալով չբացահայտված: Եվ դեկտեմբերի 15-ին Սերժ Սարգսյանի հնչեցրած այն միտքը, թե «մենք արմատից մերժեցինք լրագրողների հանդեպ ուժի կիրառման արատավոր պրակտիկան», արդեն կորցրեց իր իմաստը:
Անդրադառնալով կոնկրետ վերջին դեպքի գլխավոր հերոսին` Մհեր Սեդրակյանին, հիշեցնենք, որ այս տարվա ապրիլի 10-ին, Աժ ընտրություններից առաջ, Սասունցի Դավթի արձանի հարևանությամբ կազմակերպված նախընտրական հանրահավաքի ժամանակ, Թոխմախի Մհերին քվե տալու համար էրեբունցիներին անձամբ Սերժ Սարգսյանն էր խնդրել: «Խնդրում եմ, հիմա էլ վստահեք և քվեարկեք ինչպես ՀՀԿ-ի, այնպես էլ մեծամասնական ընտրակարգով առաջադրված թեկնածու Մհեր Սեդրակյանի օգտին»: Հետևաբար, լրագրողին հասցրած Սեդրակյանի սպառնալիքը Սարգսյանինն էլ է: Եվ եթե Մհեր Սեդրակյանը հրաժարվում է ներողություն հայցել լրագրողից, ապա շատ ժողովրդավարական կլինի, որ դա անի նրա հովանավորը` ապացուցելով իր կամքը արդար ու ապահով Հայաստան ստեղծելու»:
