«Վովա շոու». մաս 102. մամուլ
«Երեկ տեղեկացրել էինք, որ դեկտեմբերի 18-ին ՀՀ ոստիկանության Երևանի Կենտրոնի բաժնի քրեական հետախուզության երկու օպերլիազոր է ձերբակալվել: Տեղեկացրել էինք նաև, որ ի նշան բողոքի` այդ ձերբակալության դեմ բաժնի տարբեր վարչությունների մոտ 60 աշխատակիցներ ազատման դիմումներ են ներկայացրել»,- գրում է «Հայկական Ժամանակ» օրաթերթը և շարունակում.
«Կատարվածը երեկ պաշտոնապես հաստատվեց, հանգամանքների մասին հաղորդագրություն տարածեց Հատուկ քննչական ծառայությունը: «Հատուկ քննչական վարույթում քննվող քրեական գործով առաջադրվել է մեղադրանք ՀՀ ոստիկանության Երևան քաղաքի վարչության Կենտրոնականի բաժնի քրեական հետախուզության բաժանմունքի օպերլիազորների նկատմամբ` ՀՀ քրեական օրենսգրքի 309-րդ հոդվածի 2-րդ մասով և 314-րդ հոդվածով` պաշտոնական լիազորություններն անցնելու դեպքի առթիվ: ՀՀ ոստիկանության Երևան քաղաքի վարչության Կենտրոնականի բաժնի քրեական հետախուզության բաժանմունքի օպերլիսպորներ Խաչիկ Բարխուդարյանը, Արտակ Բարսեղյանը 2012թ. հոկտեմբերի 3-ին գողություններ կատարելու կասկածանքով բերման են ենթարկել քաղաքացու, առանց արձանագրություն կազմելու և համապատասխան գրանցում կատարելու աշխատասենյակում բռնություն են գործադրել նրա նկատմամբ, պատճառել առողջությանը միջին ծանրության վնաս: Դեպքի առթիվ հարուցվել է քրեական գործ: Կենտրոն և Նորք-Մարաշ վարչական շրջանների ընդհանուր իրավասության դատարանի որոշմամբ` նրանց նկատմամբ խափանման միջոց կիրառվել է կալանավորումը: Նախաքննությունը շարունակվում է»,- ասված էր հաղորդագրության մեջ:
Երեկ ոստիկանության Կենտրոնի բաժնից արդեն ներքին կարգով տեղեկություններ էին տարածվում, որ բաժնում ծեծի ժամանակ օպերլիազորներից մեկը հարվածել է իրենց մոտ բերման ենթարկված գողության համար մեղադրվողի ականջին, ինչի հետևանքով պայթել է նրա թմբկաթաղանթը: Ըստ որոշ տեղեկությունների, ծեծվածը նախկինում յոթ անգամ դատապաըտված է եղել: Երեկ ոստիկանության հասարակայնության և լրատվության բաժնից հրաժարվեցին որեւէ կերպ մեկնաբանել օպերլիազորների ձերբակալության փաստը, իսկ Կենտրոնի ոստիկանությունում չափազանց հանգիստ և խաղաղ մթնոլորտ էր, կարծես` նման դեպք չէր էլ եղել: Այստեղ նույնպես հերթապահ ոստիկանը հրաժարվեց որևէ տեղեկություն հաղորդել ինչպես ձերբակալվածների, այնպես էլ բուն դեպքի մասին: Տեղի ունեցածի կապակցությամբ զրուցեցինք ձերբակալվածներից Արտակ Բարսեղյանի եղբոր` Արթուր Բարսեդյանի հետ:
-Արթուր, Ձեր եղբայրը ձերբակալվել է, ինչի՞ համար:
-Գողին բռնելուց հետո փոխանակ ոստիկաններին պարգևատրեն, բռնում դատում են, բոլորս շոկի մեջ ենք: Իշխանություններն այսօր հավատում են յոթ անգամ դատապարտված հանցագործին, քան երկու օպերլիազորներին:
-Այսինքն, ուզում եք ասել` մեղադրանքը կե՞ղծ է, նրանք բաժնում բռնություն չե՞ն գործադրել բերման ենթարկվածի նկատմամբ, չե՞ն ծեծել:
-Ոչ, չեն ծեծել: Նրանք այդ մասին ցուցմունք են տվել:
–Իսկ հնարավո՞ր է, որ ոստիկանությունում ղեկավարության հետ խնդիրներ են ունեցել և դրա համար են ձերբակալվել:
-Չէ չէ, Արսենը ոստիկանությունում շատ կարգապահ ա, բոլորը հարգում են, և աշխատողները նույնպես շոկի մեջ են:
–Մենք տեղեկություն ունենք, որ ի նշան բողոքի այդ ձերբակալության դեմ` բաժնի տարբեր վարչությունների մոտ 60 աշխատակիցներ ազատման դիմումներ են ներկայացրել: Դուք նման ինֆորմացիայի տիրապետու՞մ եք:
-Հա, ճիշտ ա: Անգամ դատարանի բակում էին հավաքվել մեծ թվով ոստիկաններ:
–Իսկ նրանց ի՞նչ հանգամանքներում են ձերբակալել:
-Աշխատանքի տեղն են բռնել ու տարել:
–Ձեր եղբայրը նախկինում նկատողություն, տույժեր ունեցե՞լ է:
-Չէ, ոչ նկատողություն, ոչ էլ տույժ չի ունեցել: Ինքը շատ կարգապահ ա, իրա խնամակալության տակ էին ծնողներս, հայրս առողջական խնդիրներ ունի: Արտակը ամուսնացած ա, ունի երկու տարեկան երեխա:
–Իսկ Խաչիկ Բարխուդարյանին ճանաչու՞մ եք:
-Ճանաչում եմ, կարգին աշխատող ա:
–Դուք է՞լ եք ոստիկանությունում աշխատում:
-Չէ, ես չեմ աշխատում:
Նշենք, որ մի քանի շաբաթ առաջ հայտնի դարձավ, որ նոյեմբերի 15-ին ոստիկանության Նոր Նորքի բաժնում` 7 ոստիկանների կողմից առանձնակի դաժանությամբ ծեծի է ենթարկվել 31-ամյա Մհեր Անդրեասյանը, որը բերման էր ենթարկվել կողոպուտ կատարելու կասկածանքով: Այս դեպքի մասին տեղեկացրել էին Անդրեասյանի հարազատները և փաստաբանը: Պահանջելով, որ Անդրեասյանն ընդունի իր մեղքը և ցուցմունք գրի, ոստիկանները նրան ոտքերով ու բռունցքներով ծեծի են ենթարկել, ապա սկսել են հարվածներ հասցնել աթոռով: Բռնությունը դադարել է միայն այն ժամանակ, երբ Անդրեասյանը, այլևս չկարողանալով ոտքի վրա կանգնել, ընկել է պատուհանի վրա, որը կոտրվելով` վնասվածքներ է հասցրել նրան: Ոստիկանությունն այս դեպքը հերքեց: Սա նշանակում է, որ Նոր Նորքի բաժնում բռնություն գործադրածներից ոչ ոք ոչ նկատողություն ստացավ, ոչ տույժ, ոչ էլ որևէ պատասխանատվության ենթարկվեց:
Սակայն, մեր թերթում արդեն մի քանի անգամ անդրադարձել ենք Վովա Գասպարյանի հայտարարությանը, թե ինքը ոստիկանությունում ծեծուջարդ չի հանդուրժելու: Ով որ մինչև հիմա այս հայտարարությանը չէր հավատում, Կենտրոնի բաժնի երկու օպերլիազորների ձերբակալության պատմությունից հետո հաստատ կհավատա:
