Սերժ Սարգսյանն ու Գագիկ Ծառուկյանը հանդիպել են շաբաթ օրը
«Բարգավաճ Հայաստան» կուսակցության նախագահ Գագիկ Ծառուկյանը շաբաթ օրը հանդիպել է Սերժ Սարգսյանին։ Այս մասին հաղորդում է «Ազատություն» ռադիոկայանի կայքը:
Աղբյուրի տեղեկություններով, նախագահի նստավայրում կայացած հանդիպման ընթացքում քննարկվել են փետրվարի 18-ին կայանալիք նախագահական ընտրությունների հետ կապված հարցեր։
Նշվում է, որ Սերժ Սարգսյանի և Գագիկ Ծառուկյանի հանդիպման մասին տեղեկությունն, ըստ էության, չի հերքել նաև նախագահի խոսնակ Արմեն Արզումանյանը։ «Ազատություն» ռադիոկայանի հարցին ի պատասխան նա ասել է, թե նախագահն ամեն օր աշխատանքային բազմաթիվ հանդիպումներ է ունենում, որոնց մասին հաղորդագրություններ չեն տրվում։
Գագիկ Ծառուկյանի խոսնակ Իվետա Տոնոյանն էլ ասել է, թե պաշտոնական որևէ հանդիպման մասին տեղեկատվության չի տիրապետում։
