«Ով է լինելու ընդդիմություն, ով՝ իշխանություն, պետք է որոշեն ընտրողները». Անդրիաս Ղուկասյան
![](https://168.am/wp-content/uploads/2018/07/AC8F2A36-EF09-4B7A-9EED-604EC9409F56_w1023_r1_s-1.jpg)
«Մենք երկրում ունեցել ենք քրեական ռեժիմ, իշխանության յուրացում, համակարգված կոռուպցիա, ընդհուպ՝ մինչև պետական շահերի դավաճանություն։ Ընդդիմություն համարվում էին այն ուժերը, ովքեր դեմ էին դուրս գալիս այդ իրավիճակին»,- այսօր լրագրողների հետ հանդիպման ընթացքում այս մասին ասաց նորաստեղծ «Հայ կառուցողական կուսակցության» նախագահ Անդրիաս Ղուկասյանը:
Նրա խոսքով՝ ընդդիմությունն այդ ժամանակ եղել է մի քանի տեսակի.
«Ռադիկալ ընդդիմությունից սկսած՝ ունեցել ենք իշխանության հետ կոմպրոմիսի գնացող ուժեր։ Այսօր այդ դասական առումով մեր պատկերացումները պետք է փոխվեն։ Ընդդիմություն է լինելու այն ուժը, որը բավարար քվե չի հավաքի ընտրություններում, և որը չի դառնալու իշխանություն։ Ով է լինելու ընդդիմություն, ով՝ իշխանություն, պետք է որոշեն ընտրողները։ Այսօր յուրաքանչյուր քաղաքական ուժ հանդես է գալու իր տեսլականով, աշխարհաքաղաքական կողմնորոշմամբ, ներքին փոփոխությունների ծրագրով, և հանրությունը կորոշի՝ ով է ընդդիմություն, ով՝ իշխանություն»։
Ինչպես կուսակցության առաջին համագումարի օրը, այդպես էլ այսօր Ղուկասյանն ընդգծեց, որ հիմա իրենք ժամանակավոր կառավարության կողքին են, ինչով հնարավոր է՝ պատրաստ են աջակցել։