«Այդպիսի հարց «Ելք» խմբակցությունը երբեք չի բարձրացրել. դա թյուրըմբռնում է». Նիկոլ Փաշինյան
Այսօր ԱԺ հատուկ նիստում ՀՀԿ-ական պատգամավոր Ջեմմա Բաղդասարյանը հայտարարեց, թե երբ ԱԺ-ում քննարկվում էր «Զինծառայության և զինծառայողների կարգավիճակի մասին» օրենքի նախագիծը, «Ելքը» հարց էր բարձրացնում, որ պաշտոնյաները, որոնք չեն ծառայել, պետք է վայր դնեն իրենց լիազորությունները։ Նա հետաքրքրվեց, թե այսօ՞ր էլ ՀՀ վարչապետի թեկնածու Նիկոլ Փաշինյանը նույն կարծիքին է։
«Այդպիսի հարց «Ելք» խմբակցությունը երբեք չի բարձրացրել։ Դա թյուրըմբռնում է։ Բոլորովին ուրիշ հարցեր են բարձրացվել։ Որովհետև «Ելք» խմբակցությունում կան նաև մարդիկ, ովքեր սահմանված կարգով օրենքով համապատասխան ձևով ժամկետային զինվորական ծառայություն չեն անցել այնպես, ինչպես ՀՀԿ խմբակցության բազմաթիվ պատգամավորներ, այնպես, ինչպես ՀՀ բազմաթիվ այլ քաղաքացիներ»,- հայտարարեց Ն.Փաշինյանը։
Ըստ նրա՝ խնդիրն այն է, թե որևէ մեկի գործողություններում տեսականում կամ գործնականում կա՞ օրենքի խախտում. «Ես այդ թեմային բազմիցս եմ անդրադարձել, և սրանով ամեն ինչ ասված է։ Ինչ վերաբերում է հայրենիքի անվտանգությանը ծառայելուն, ես միշտ ծառայել եմ, պատեհ առիթով՝ նաև զինվորական կարգով, և պատրաստ եմ նաև գերագույն գլխավոր հրամանատարի կարգավիճակում ծառայել իմ հայրենիքի անվտանգությանը»։
