Քաղաքապետարանի կոմունալ վարչության պետը` Երևանի ջրահեռացման համակարգի մասին
Մայրաքաղաքի սելավատարերը մաքրվել եւ շարունակելու են էլ ավելի ինտենսիվ մաքրվել: Երևանում օրեր առաջ սելավատարերի խցանման պատճառը ինչպես աննախադեպ տեղումներն էին, այնպես էլ սելավատարեր լցված ծառերի ջարդված ճյուղերն ու տերեւները: «Արմենպրես»-ի հաղորդմամբ, այս մասին լրագրողների հետ ճեպազրույցում ասաց Երեւանի քաղաքապետարանի աշխատակազմի կոմունալ տնտեսության վարչության պետ Հրայր Անտոնյանը: Նրա խոսքով` 15 րոպեի ընթացքում տեղացել է նորմայից բավական շատ անձրեւ:
«Երեւանի քաղաքապետարանը վերահսկում է «Վիոլա ջուր» ընկերության կողմից իրականացվող ամենօրյա աշխատանքները: Մենք արձանագրում ենք բոլոր թերություններն ու տալիս ենք համապատասխան հանձնարարականներ դրանք վերացնելու ուղղությամբ»,-ասաց Անտոնյանը՝ վստահեցնելով, որ մայրաքաղաքի ջրահեռացման համակարգն անթերի աշխատում է իր եղած նորմաների չափով:
Հիշեցնենք, որ հունիսի 12-ին մայրաքաղաքում տեղացած կարկուտի, ապա հորդառատ անձրեւի հետեւանքով սելավատարերը խցանվել էին: Քաղաքի կենտրոնական հատվածներում, ավտոմեքենաները կիսով չափ հայտնվել էին ջրի մեջ: Ջրի կուտակումները շատ էին հատկապես գետնանցումներում:
