Աֆղան Մուխտարլին չի ցանկանում Ադրբեջանի քաղաքացի մնալ
Աֆղան Մուխտարլըն, ով Թբիլիսիում առևանգվելով անօրինաբար տեղափոխվել է Բաքու և ձերբակալվել, չի ցանկանում Ադրբեջանի քաղաքացի մնալ: Այս մասին հայտնում է ադրբեջանական «Բաստաինֆո»-ն:
Աֆղան Մուխտարլըն հայտնել է, որ չի ցանկանում լինել մի երկրի քաղաքացի, որը զբաղվում է իր քաղաքացիների առևանգմամբ:
Մուխտարլըն նաև երկրի ղեկավարությանը կոչ է արել արդարացի գտնվել և օբեկտիվորեն պատժել այս գործում ներգրավված բոլոր մեղավորներին:
Լրագրողի փաստաբան Սադըգովը հայտնել է, որ իր պաշտպանյալը ցանկություն է հայտնել հանդիպել Ադրբեջանում Վրաստանի դեսպանի հետ:
«Մենք իրավաբանորեն պահանջել ենք, որ Ադրբեջանում Վրաստանի դեսպանը հանդիպի Մուխտարլըին, պարզաբանումներ տա նրա՝ Վրաստանում առևանգման հետ կապված և պատասխանի պաշտպանյալիս հարցերին»,- ասել է Սադըգովը:
Աֆղան Մուխտարլին հայտնի է որպես ադրբեջանական իշխանությունների վարած քաղաքականության քննադատ: 2015 թվականից ի վեր ստիպված է եղել բնակություն հաստատել Թբիլիսիում: Օրերս նա անհետացել էր, ինչի կապակցությամբ ընտանիքը դիմել էր ոստիկանություն: Ավելի ուշ նա հայտնվել էր Բաքվում և ձերբակալվել:
Ադրբեջանի իշխանությունները նրան մեղադրում են գումարի ապօրինի տեղափոխման և սահմանը հատելու մեջ:
Մաուխտարլըն չի ընդունում իրեն առաջադրված մեղադրանքը, և գտնում է, որ իրեն ձերբակալել են ընդդիմադիր լրագրողական գործունեության պատճառով:
