Թուրքիայի մեջլիսի ընդդիմադիր պատգամավորը դատապարտվել է երկուս ու կես տարվա ազատազրկման
Թուրքիայում կրկին կալանավորված քրդամետ Ժողովուրդների դեմոկրատական կուսակցության պատգամավոր Բեսիմե Քոնջան դատապարտվել է երկու տարի և վեց ամիս ազատազրկման: Այս մասին հայտնում է թուրքական Diken լրատվամիջոցը:
Պատգամավորը դատապարտվել է ազատազրկման «զինված հանցախմբի անդամ լինելու» և «ահաբեկչական խմբավորման քարոզչություն իրականացնելու» հիմնավորումներով:
Քոնջան ձերբակալվել էր 2016 թվականի դեկտեմբերին, սակայն դատարանը 2017 թվականի մայիսի 3-ին նրան ազատ էր արձակել: Երկրորդ անգամ պատգամավորին կալանավորել էին Բաթմանի օդանավակայանում մայիսի 29-ին:
Նրա կալանավորմամբ քրդամետ կուսակցության կալանավորված պատգամավորների թիվը հասավ 11-ի: Նրանց շարքում է նաև կուսակցության առաջնորդ Սելահաթթին Դեմիրթաշը: Կուսակցության մյուս համանախագահ Ֆիգեն Յուքսեքդաղը և պատգամավոր Նուրսել Այդողանը զրկվել են պատգամավորական մանդատից:
