Համայն Ռուսիո պատրիարք Կիրիլը շքանշան է շնորհել Սամվել Կարապետյանին
Մոսկվայի և Համայն Ռուսիո պատրիարք Կիրիլը «Տաշիր» ընկերությունների խմբի հիմնադիր և նախագահ Սամվել Կարապետյանին շնորհել է սուրբ մեծ իշխան Դանիլ Մոսկվացու III աստիճանի շքանշան՝ Դուբրովկայում սուրբ Կիրիլի ու Մեթոդիոսի անվան տաճարի շինարարության հարցում ունեցած ավանդի համար: Այս մասին տեղեկանում ենք tashir.ru-ից:
Մոսկվայի նոր տաճարը գտնվում է Դուբրովկայում, այն կառուցվել է ի հիշատակ 2002 թվականի ողբերգական իրադարձությունների: Ինչպես հայտարարել է պատրիարք Կիրիլը, նոր սրբատեղիի կառուցումը ցույց է տալիս ահաբեկչության անմեղ զոհերի նկատմամբ վերաբերմունքը ու նրանց, ով պաշտպանել ու պաշտպանում է մեզ վտանգներից:
Կիրիլի ու Մեթոդիոսի տաճարը Դուբրովկայում դարձել է առաջին եկեղեցին, որի շինարարությունը կայացել է Մոսկվայում 200 տաճարների շինարարության ծրագրի իրականացման շրջանակում, որի նախաձեռնությունը պատկանում է Մոսկվայի և Համայն Ռուսիո պատրիարքին:
Սա առաջին մրցանակը չէ, որին արժանացել է Սամվել Կարապետյանը: Այսպես, 2012 թվականին պատրիարք Կիրիլը նրան շնորհել էր Ռուս ուղղափառ եկեղեցու Փառքի ու ազնվության II աստիճանի շքանշան՝ սուրբ Նիկոլայ Հրաշագործի անվան տաճարի վերականգնման գործում ունեցած ավանդի համար:
Իսկ 2001-ին Մոսկվայի ու Համայն Ռուսիո պատրիարք Ալեքսեյ 2-րդը նրան շնորհել էր սուրբ Դանիլ Մոսկվացու II աստիճանի շքանշան Կալուգայի մարզի Նեդելնոյե գյուղի եկեղեցու վերականգնման համար:
