«Ես և Կոուտինիոն կփորձենք հասնել Ռոնալդոյի և Ռոնալդինիոյի մակարդակին». «Լիվերպուլի» ֆուտբոլիստ Ֆիրմինո
«Լիվերպուլի» և Բրազիլիայի հավաքականի կիսապաշտպանը հույս ունի, որ Ֆիլիպե Կոուտինիոյի հետ համագործակցելու արդյունքում նրանք հաջողության կհասնեն:
«Յուրաքանչյուրի համար էլ դժվար է դառնալ այնպիսի լավ ֆուտբոլիստներ, ինչպիսին Ռոնալդոն և Ռոնալդինիոն էին, բայց ես և Ֆիլիպեն կանենք ամեն ինչ, որպեսզի որքան հնարավոր է՝ մոտենանք նրանց մակարդակին և անենք առավելագույնը` Բրազիլիայի համար:
Այն, ինչ տեղի ունեցավ Աշխարհի առաջնության կիսաեզրափակչի Գերմանիայի դեմ խաղում, պարզապես սարսափելի էր, բայց հավաքականում այժմ կան նոր ֆուտբոլիստներ, ովքեր կարող են ամեն ինչ փոխել և ցույց տալ, որ Բրազիլիան դեռ ունի շատ տաղանդներ, ովքեր կարող են հաջողություն բերել»,- Ֆիրմինոյի խոսքերը մեջբերում է Goal.com-ը:
«Սելեսաոյի» կազմում 23-ամյա բրազիլացին անցկացրել է 10 հանդիպում:
Ամռանը բրազիլացիները հասան Կոպա Ամերիկայի քառորդ եզրափակիչ, որտեղ 11 մետրանոց հարվածաշարի արդյունքում պարտվեցին Պարագվային:
Պատրաստեց Անի Գաբուզյանը
