Պաղեստինի առաջնորդը հաստատել է Իրան այցելելու իր մտադրությունը
Պաղեստինի ազգային ադմինիստրացիայի ղեկավար Մահմուդ Աբասը հաստատել է մոտ ժամանակներս Իրան այցելելու իր մտադրությունը՝ հավելելով, որ այցի հստակ օրեր դեռ նշանակված չեն, հայտնում է իսրայելական Jerusalem Post թերթը:
«Իրան այցը կկայանա, սակայն օրը դեռ նշանակված չէ»,- պարբերականը մեջբերում է Աբասի հայտարարությունը, որ արվել է Ռամալայում լրագրողների հետ հանդիպմանը: Մահմուդ Աբասը հավելել է, որ Իրանը «հարևան, եղբայրական երկիր է»:
«Մեր հարաբերությունները Իրանի հետ այնքան էլ լավը չեն եղել, սակայն մենք ունենք դեսպանություն Թեհրանում ու իրանցիները մեզ ընդունում են»,- ասել է Աբասը:
Վերջին անգամ Աբասը Իրան այցելել էր 2012-ին, երբ Թեհրանում անցկացվում էր «Չմիավորման շարժման» մասնակիցների 16-րդ գագաթաժողովը:
