Սկանդալ Հռոմում. հայտնի մաֆիոզիին թաղել են աներևակայելի ճոխությամբ ու «Կնքահայրը» ֆիլմի երաժշտության ներքո
Հռոմում հայտնի մաֆիոզիի շքեղ թաղումը երկրում վրդվմունքի ալիք է բարձրացրել: 65-ամյա Վիտորիո Կասամոնիկային վերջին հրաժեշտն են տվել աներևակայելի ճոխությամբ ու «Կնքահայրը» ֆիլմի երաժշտության ներքո, հայտնում է BBC-ն:
Հանգուցյալի դագաղը Հռոմի Սան Ջովաննի Բոսկո եկեղեցի են տարել կառքով, որին լծված է եղել 6 ձի, կառքին հետևել է սև լիմուզինը՝ ծաղկեպսակներով: Ուղղաթիռից թափվել են կարմիր վարդի ծաղկաթերթիկներ:
«Դուք կարողացաք գրավել Հռոմը, հերթը դրախտինն է», «Հռոմի արքա» ու նմանատիպ այլ գրություններ են զարդարել եկեղեցու դարպասների վրա ամրացված պաստառները:
Հարյուրավոր արտասվող մարդիկ են գնացել վերջին հրաժեշտը տալու Կասամոնիկային, ով, ենթադրաբար, մահացել էր քաղցկեղից:
Հոգևորականներն ասել են, թե իրենք չեն կարող վերահսկել եկեղեցու պատերից դուրս տեղի ունեցածը:
Իտալացի քաղաքական գործիչներն արդեն դատապարտել են այդ ցուցամոլությունը:
Ձախ կուսակցությունների պատգամավորները կոչ են արել Իտալիայի իշխանություններին պարզել, թե ով է թույլ տվել նման շքեղ թաղման արարողության անցկացումը:
«Նման բանը միանգամայն անթույլատրելի է դեմոկրատական պետությունում»,- ասվում է պատգամավորների հայտարարության մեջ:
Կասամոնիկա մաֆիոզ կլանին իտալական իշխանությունները մեղադրում են խարդախության, թմրանյութերի առևտրի, փողերի լվացման ու «ռեկետի» մեջ: 
