Լևոն Հայրապետյանը ևս երկու ամիս կմնա տնային կալանքի տակ
Մոսկվայի քաղաքային դատարանը ևս երկու ամսով երկարաձգել է հայ գործարար ու հասարակական գործիչ Լևոն Հայրապետյանին տնային կալանքի տակ պահելու ժամկետը: Այս մասին հայտնում է Interfax-ը:
Ավելի վաղ հետաքննությունը միջնորդություն էր ներկայացրել՝ երկարաձգելու Լևոն Հայրապետյանին տնային կալանքի տակ պահելու որոշումը, որպեզի նա ու նրա պաշտպանությունը հասցնեն ավարտել գործի նյութերի հետ ծանոթությունը:
Դատախազը խնդրել է աջակցել հետաքննության միջնորդությունը: Նա ընդգծել է, որ Հայրապետյանն ունի երկքաղաքացիություն, անշարժ գույք ԱՄՆ-ում ու Մոնակոյում, ինչպես նաև դրամական մեծ միոջոցներ, այդ իսկ պատճառով կարող է թաքնվել հետաքննությունից ու խոչընդոտել գործի քննությանը, եթե գտնվի ազատության մեջ:
Լևոն Հայրապետյանի փաստաբանը չի ընդունել փաստարկները՝ հայտարարելով, որ պաշտպանյալը ներկայում անձնագրեր չունի, ինչի պատճառով էլ չի կարող թաքնվել:
Հիշեցնենք, որ Հայրապետյանը ձերբակալվել է 2014 թվականի հուլիսին Մոսկվայի «Դոմոդեդովո» օդանավակայանում: Նույն թվականի հուլիսի 24-ին ՌԴ Քննչական կոմիտեն նրան մեղադրանք է առաջադրել ՌԴ ՔՕ 160-րդ և 174-րդ հոդվածներով («օտար գույքի յուրացում կամ վատնում» և «ապօրինի ճանապարհով ձեռք բերած միջոցների օրինականացում»:
