Այն երկրները, որոնք ամեն ինչ անում են, որպեսզի պատերազմը շարունակվի, չպետք է խոսեն որևէ «կարմիր գծերի» մասին. Դմիտրի Պեսկով
Այն երկրները, որոնք «ամեն ինչ անում են, որպեսզի պատերազմը շարունակվի», չպետք է խոսեն որևէ «կարմիր գծերի» մասին: Այս մասին ասել է ՌԴ նախագահի մամուլի քարտուղար Դմիտրի Պեսկովը։
Այս թեման բարձրացվել է Ռումինիայում անօդաչու թռչող սարքի ընկնելու համատեքստում։ Եվրոպական հանձնաժողովի նախագահ Ուրսուլա ֆոն դեր Լայենը, պնդելով, որ դրան առնչություն ունի Ռուսաստանը, մեղադրել է Մոսկվային «կարմիր գծերը» հատելու մեջ։
«Նրանք՝ ԵՄ-ում, արդեն հատել են այն ամենը, ինչ հնարավոր էր հատել, ուստի այստեղ այլևս իմաստ չունի հաշվել: Բայց ինչ էլ որ տեղի ունենա, բոլոր խնդիրների սկզբնաղբյուրը Ուկրաինան և Կիևի ռեժիմի գործողություններն են։ Մնացած ամեն ինչ դրա հետևանքն է։ Այն երկրները, որոնք անում են ամեն հնարավորը, որպեսզի պատերազմը շարունակվի, չպետք է խոսեն որևէ «կարմիր գծերի» մասին»,- պատասխանել է Պեսկովը այն հարցին, թե քանի սահման են անցել եվրոպացիները։
