Իսլանդիան ճանաչվել է աշխարհում բնակության համար ամենաթանկ երկիրը
Իսլանդիան շրջանցել է Շվեյցարիային՝ դառնալով բնակության համար աշխարհի ամենաթանկ երկիրը։ Այս մասին գրում է շվեդական TT գործակալությունը՝ հղում անելով Իսլանդիայի բուհերի շրջանավարտների Viska արհմիության տվյալներին։
Փորձագետներն իրենց հաշվարկներում հիմնվել են Եվրոստատի և Իսլանդիայի կենտրոնական բանկի (Sedlabanki) տվյալների վրա։ Կազմակերպության տնտեսագետ Վիլհյալմուր Հիլմարսոնի խոսքով՝ Իսլանդիայում գները մոտ 3%-ով ավելի բարձր են, քան Շվեյցարիայում։ Գնաճը մեծապես պայմանավորված է նրանով, որ կղզու տնտեսության հիմքը տուրիզմն է։ Դա հանգեցնում է ծառայությունների ոլորտի գնաճի և աշխատավարձերի բարձրացման։ Մեկ այլ պատճառ էլ բնակարանների բարձր գներն են։
Հիլմարսոնը կարծում է, որ Իսլանդիան չափից ավելի շատ է կախված աշխատատար ոլորտներից, ինչն էլ շարունակելու է գնաճային ճնշում ստեղծել։
Ըստ Եվրոստատի տվյալների՝ Իսլանդիայում գները վերջին անգամ Շվեյցարիայից բարձր են եղել 2018 թվականին։
