Ռուսաստանում 144 մարդ դատապարտվել է պետգաղտնիքի հասանելիությամբ արտերկիր մեկնելու համար. ТАСС
Ռուսաստանի դատարաններն անցած տարի 144 դատավճիռ են կայացրել պետական գաղտնիքի հասանելիություն ունեցող ռուսաստանցիների՝ արտերկիր կատարած ինքնակամ ուղևորությունների համար։ Այս մասին հայտնել են Ռուսաստանի Գերագույն դատարանի մամուլի ծառայությունից՝ պատասխանելով ТАСС-ի հարցմանը։
2022 թվականի ամռանը ՌԴ Քրեական օրենսգրքում հայտնվեց հոդված պետական գաղտնիքի պաշտպանության պահանջները խախտելու համար պատասխանատվության մասին (ՔՕ 283.2 հոդվածի 1-ին մաս)՝ պետական գաղտնիքի հասանելիություն ունեցող կամ նախկինում ունեցած անձի կողմից արտերկիր մեկնելու համար, որի մեկնելու իրավունքը նրա համար նախապես սահմանափակված է եղել։
Այն մեղավորների համար նախատեսում է 200 հազարից մինչև 500 հազար ռուբլի տուգանք կամ մինչև երեք տարվա ազատազրկում։
Ինչպես հայտնել են Գերագույն դատարանից, 2025 թվականին այս հոդվածով դատարանները պատասխանատվության են ենթարկել 144 անձի, այդ թվում՝ 36 կնոջ։ 139 ամբաստանյալի դատարանները տուգանք են նշանակել, 2-ը ստացել են պայմանական ազատազրկում, 3-ն ազատվել են պատժից։ Բացի այդ, ևս 20 անձի նկատմամբ դատարանները կարճել են քրեական գործերը՝ նշանակելով դատական տուգանք (ՌԴ ՔՕ հոդվածով նախատեսված տուգանքի առավելագույն չափի մինչև 50%-ը)։
Պատասխանատվության ենթարկվածների մեծ մասը եղել են 31-ից 60 տարեկան (99 մարդ), 30 ամբաստանյալ եղել է 60 տարեկանից բարձր, 15-ը՝ 18-ից 30 տարեկան։ Պատասխանատվության ենթարկվածների մեկ երրորդը ձեռնարկությունների աշխատակիցներ են (49), ևս 47-ը՝ արդեն չաշխատող կամ մշտական եկամուտ չունեցող, 23-ը՝ առևտրային կամ այլ ձեռնարկությունների ծառայողներ, 8 պաշտոնյա, 5 զինծառայող և իրավապահ մարմինների մեկ աշխատակից։
Վիճակագրությունը վկայում է նման դատավճիռների թվի աճի մասին։ Ավելի վաղ հաղորդվում էր, որ 2023 թվականին դատարաններն այս հոդվածով պատասխանատվության են ենթարկել 70 անձի, 2024 թվականին՝ 129 անձի։ Եթե 2023 թվականին դատարաններն այս հոդվածով նշանակել էին ընդհանուր առմամբ 13 միլիոն ռուբլու տուգանք, ապա 2024 թվականին՝ 23 միլիոն ռուբլու։
