Հավաքականում խաղալու հույս միշտ կա․ Բայրամյան
«Ռոստովի» կիսապաշտպան Խորեն Բայրամյանը «Матч ТВ»-ի եթերում խոստովանել է, որ շատ ծանր է տարել Հայաստանի ազգային հավաքականի ջախջախիչ պարտությունը Պորտուգալիայի ընտրանու դեմ կայացած ԱԱ-2026-ի ընտրական փուլի խաղում։
Հիշեցնենք, որ նոյեմբերի 16-ին Պորտուում կայացած հանդիպումն ավարտվել էր պորտուգալացիների հաղթանակով՝ 9:1։ Նշենք նաև, որ Բայրամյանը Հայաստանի հավաքականի կազմում չի ընդգրկվել 2023 թվականից ի վեր։
— Ինչպե՞ս ընդունեցիք Հայաստանի հավաքականի խոշոր պարտությունը։
— Չեմ ասի, թե լացել եմ, բայց շատ ցավոտ էր։ Շատ ծանր զգացողություն է, երբ ֆուտբոլը դիտում ես տանը, սարսափելի հուզմունք ես ապրում։ Ես երբեք նման իրավիճակում չեմ հայտնվել, որ այդպիսի հաշվով պարտվեմ, բայց ցանկացած խոշոր պարտություն միշտ այդպես է ընկալվում։ Ինձ թվում է՝ այդ 1:9 հաշիվը ես վերապրեցի տղաների հետ միասին։
— Մեկնարկային սուլոցից առաջ լարվածություն զգացվո՞ւմ է, նույնիսկ երբ խաղը հեռուստացույցով եք դիտում։
— Այո, միշտ։ Դա վերաբերում է և՛ հավաքականին, և՛ «Ռոստովին»։ Հեռուստացույցով դիտելը միշտ ավելի դժվար է, քան դաշտում գտնվելը։
— Ձեզ վաղուց չեն հրավիրել հավաքական։ Հույս կա՞ նորից խաղալու, թե՞ այդ էջը փակված է։
— Հավաքականում խաղալու հույս միշտ կա։ Որոշողը նրանք են, իսկ ես պետք է պատրաստ լինեմ հրավերին։ Կարծում եմ՝ մարզիչը գիտի, որ ես ցանկանում եմ խաղալ։
