Շրի Լանկայում ջրհեղեղների հետևանքով զոհերի թիվը հասել է 159-ի
Շրի Լանկայի իշխանությունները կիրակի օրը մայրաքաղաքի որոշ շրջաններում պայքարում են ջրհեղեղի ջրերի դեմ, այն բանից հետո, երբ հզոր ցիկլոնը կործանարար հետք էր թողել՝ խլելով առնվազն 159 մարդու կյանք ամբողջ երկրում, հայտնում է AFP-ն։
Տարերային աղետների դեմ պայքարի կենտրոնը (DMC) հայտնել է, որ Կոլոմբոյի հյուսիսային մասը ենթարկվել է լուրջ ջրհեղեղի, քանի որ Կելանի գետի ջրի մակարդակը շարունակել է բարձրանալ։
DMC-ի տվյալներով, զոհերի թիվը հասել է 159-ի, ևս 203 մարդ անհետ կորել է մեկ շաբաթ տևած հորդառատ անձրևներից հետո, որոնք առաջացրել էր «Դիտվա» ցիկլոնը։ Վերջինս շաբաթ օրը լքել է Շրի Լանկան։
Երկրի նախագահ Անուրա Կումարա Դիսանայակեն շաբաթ օրը արտակարգ դրություն է հայտարարել ցիկլոնի հետևանքների պատճառով և դիմել է միջազգային օգնության։
Հնդկաստանն առաջինն է արձագանքել՝ ուղարկելով մարդասիրական օգնություն և երկու ուղղաթիռ անձնակազմով՝ փրկարարական գործողությունների համար։ Ճապոնիան հայտարարել է, որ կուղարկի խումբ՝ հրատապ կարիքները գնահատելու համար և խոստացել է հետագա աջակցություն։ Չնայած ամբողջ կղզում անձրևները դադարել են, սակայն ամենաշատ տուժած կենտրոնական նահանգում մի քանի ճանապարհներ դեռևս անանցանելի են, հայտնել է DMC-ն։
Ծայրահեղ եղանակային պայմանների հետևանքով ավերվել է ավելի քան 20․000 տուն, իսկ 122․000 մարդ տեղափոխվել է պետության կողմից կառավարվող ժամանակավոր ապաստարաններ։ Եվս 833․000 մարդ օգնության կարիք ունի՝ ստիպված լինելով լքել իրենց տները ջրհեղեղի պատճառով։
Բանակի, նավատորմի և օդուժի զինծառայողներ են ուղարկվել՝ քաղաքացիական աշխատողների և կամավորների հետ աղետի հետևանքները վերացնելու համար։
Պաշտոնյաները հայտնել են, որ երկրի տարածքի մոտ մեկ երրորդը մնում է առանց էլեկտրականության և ջրամատակարարման՝ էլեկտրահաղորդման գծերի խափանման և մաքրման կայանների հեղեղման հետևանքով։ Նաև խաթարվել է ինտերնետային կապը։ Ցիկլոնը դարձել է Շրի Լանկայի ամենամահաբեր բնական աղետը 2017 թվականից ի վեր, այն ժամանակ ջրհեղեղներն ու սողանքները խլել էին ավելի քան 200 մարդու կյանք և ստիպել հարյուր հազարավոր մարդկանց տեղափոխվել։ Դարասկզբի ամենաուժեղ ջրհեղեղը տեղի է ունեցել 2003 թվականի հունիսին, երբ զոհվել էր 254 մարդ։
