ԵՄ-ն աջակցում է ՀՀ-ին և Ադրբեջանին լիակատար խաղաղության և տարածաշրջանային հաջողության ճանապարհին
Եվրամիությունը կշարունակի համագործակցությունն Ադրբեջանի և Հայաստանի հետ՝ տարածաշրջանում կայուն խաղաղության և փոխադարձ զարգացման հասնելու ուղղությամբ։
Հարավային Կովկասում ԵՄ հատուկ ներկայացուցիչ Մագդալենա Գրոնոն այս մասին գրել է «X» սոցիալական ցանցում։
«Ես ավարտեցի նոյեմբերի 18-19-ը Երևանում կայացած բարձր մակարդակի, ինտենսիվ և կարևոր խորհրդակցությունները։ Շնորհակալություն եմ հայտնում փոխվարչապետ Մհեր Գրիգորյանին, Արտաքին գործերի նախարար Արարատ Միրզոյանին և կառավարության այլ պաշտոնյաներին՝ Ադրբեջանի և Հայաստանի միջև խաղաղության գործընթացի, Թուրքիայի և Հայաստանի միջև հարաբերությունների կարգավորման, մարդասիրական հարցերի, կապի և տարածաշրջանային համագործակցության վերաբերյալ խորը և մանրամասն մտքերի փոխանակման համար։ Ես նաև գոհ էի քաղաքացիական հասարակության ներկայացուցիչների հետ հետաքրքիր քննարկումներից։ Եվրամիությունն աջակցում է մեր ադրբեջանցի և հայ գործընկերներին լիակատար խաղաղության և տարածաշրջանային հաջողության ճանապարհին», – նշել է նա։
