Նիդեռլանդները չեղարկել է ռազմածովային տեխնիկայի մատակարարումներն Իսրայել
Նիդեռլանդները չեղարկում է ռազմածովային տեխնիկայի մատակարարումներն Իսրայել՝ Գազայի հատվածում իրավիճակի վատթարացման պատճառով: Այս մասին հաղորդում է NOS հեռուստառադիոընկերությունը՝ հղում անելով երկրի արտաքին գործերի նախարարությանը։
Հեռուստաընկերության տվյալներով՝ Նիդեռլանդների ԱԳՆ-ն հետ է կանչում Իսրայել ռազմածովային նավերի բաղադրիչների արտահանման երեք թույլտվությունները։
Նիդեռլանդների ԱԳ նախարարության ներկայացուցիչը նշել է, որ թույլտվությունները վերանայվել և հետ են կանչվել հուլիսին՝ «Գազայի հատվածում իրավիճակի վատթարացման» և ռազմական տեխնիկայի «անցանկալի վերջնական օգտագործման ռիսկի» պատճառով։
Նիդեռլանդներում իրավապաշտպանները և փորձագետները բազմիցս մտահոգություն են հայտնել, որ Նիդեռլանդներից Իսրայել արտահանվող զենքը կարող է նպաստել բռնությանը և ցեղասպանությանը Գազայի հատվածում։
Նիդեռլանդների Միջազգային հանրային իրավունքի խորհրդատվական կոմիտեն (CAVV) օգոստոսի 5-ին հրապարակված իր զեկույցում եկել է այն եզրակացության, որ Նիդեռլանդների կառավարությունն իրավաբանորեն պարտավոր է միջոցներ ձեռնարկել ցեղասպանությունը կանխելու համար, այդ թվում՝ Գազայի հատվածում։
Գերմանիան իր հերթին հայտնել է, որ կասեցնում է այն զենքերի արտահանումն Իսրայել, որոնք կարող են օգտագործվել Գազայի հատվածում։
Օգոստոսի 8-ի առավոտյան Իսրայելի անվտանգության կաբինետը հաստատել է Գազա քաղաքը վերահսկողության տակ վերցնելու ծրագիրը, որում ներկայացվում են պատերազմին վերջ դնելու հետևյալ հինգ սկզբունքները՝ ՀԱՄԱՍ-ի զինաթափում, բոլոր պատանդների վերադարձ՝ ինչպես մահացած, այնպես էլ ողջ մնացած, Գազայի հատվածի ապառազմականացում, Գազայի հատվածի նկատմամբ Իսրայելի անվտանգային վերահսկողություն և այլընտրանքային քաղաքացիական կառավարության ստեղծում, որը չի լինի ո՛չ ՀԱՄԱՍ-ը, ո՛չ Պաղեստինյան ինքնավարությունը։
