Ուկրաինայի նախարարների կաբինետը ևս 392 մլն դոլար է հատկացրել անօդաչու սարքերի գնման համար
Ուկրաինայի նախարարների կաբինետը ևս 392 միլիոն դոլար է հատկացրել անօդաչու սարքերի ձեռքբերման համար։ Ինչպես տեղեկացնում է «ТАСС»-ը, այդ մասին հայտարարել է վարչապետ Դենիս Շմիգալը։
Կառավարությունը նախկինում ավելի քան 1 միլիարդ դոլար է հատկացրել անօդաչու սարքեր գնելու համար։ «Այսօր հատկացված միջոցների համար 300 հազար անօդաչու թռչող սարք կտրամադրվի մեր անվտանգության և պաշտպանության ուժերին», – ասել է Շմիգալը։
Նրա խոսքով՝ միջոցները կփոխանցվեն Կապի հատուկ պետական գործակալության վարչակազմին, որը զբաղվում է անօդաչու սարքերի գնմամբ։
Դեռևս 2023 թվականի դեկտեմբերին Ուկրաինայի օդային հետախուզության աջակցության կենտրոնի ղեկավար Մարիա Բեռլինսկայան ասել էր, որ զինված ուժերը ստիպված կլինեն նահանջել, եթե իշխանությունները երկրում հարձակողական անօդաչու սարքերի հավաքման միջոց չգտնեն։ Նա նշել է, որ ուկրաինական տեխնիկայի առյուծի բաժինը ոչնչացնում են ռուսական գրոհային անօդաչու սարքերը, որոնց արտադրությունն ակտիվորեն զարգանում է։
Ընթացիկ տարվա մարտին Ուկրաինայի զինված ուժերի գլխավոր հրամանատար Ալեքսանդր Սիրսկին հայտարարեց նաև մարտական գործողություններում գրոհային անօդաչու թռչող սարքերի և էլեկտրոնային պատերազմի համակարգերի վճռորոշ դերի մասին։ Թեև Ուկրաինայի նախագահ Վլադիմիր Զելենսկին խոստացել է ապահովել 1 միլիոն անօդաչու թռչող սարքերի արտադրությունը 2024 թվականին, զինվորականները դժգոհում են անօդաչու թռչող սարքերի պակասից, և թվային փոխակերպման նախարարությունն առաջարկել է ուկրաինացիներին ինքնուրույն գնել մասեր և անօդաչու սարքեր հավաքել տանը։
