«Զառանցանք է»․ Կարասինը հերքել է Հայաստանում հեղաշրջում նախապատրաստելու մասին լուրերը
Պնդումներն այն մասին, թե Կրեմլը Հայաստանում պետական հեղաշրջում է նախապատրաստում, զառանցանք է, որը մեկնաբանության կարիք չունի։ Ըստ armeniasputnik.am-ի՝ News.ru-ի հետ զրույցում այս հայտարարությունն է արել Դաշնության խորհրդի միջազգային կոմիտեի ղեկավար Գրիգորի Կարասինը:
Նրա խոսքով՝ նման հայտարարություններ անելուց և նման մեղադրանքներ հնչեցնելուց առաջ պետք է իրական փաստեր ներկայացնել, որոնք կհաստատեն տեղեկությունը:
«Ոչ խելացի քաղաքական գործիչներն են ինչ-որ վիրտուալ սխեմաներ հորինում ու դրա մասին աշխարհով մեկ գոռում։ Նման հայտարարությունները տարածվում են Ռուսաստանի նկատմամբ թշնամանք հրահրելու համար։ Դա պետք է նրանց, ովքեր փորձում են լարել իրավիճակը և հասնել իրենց նպատակներին»,- ասել է Կարասինը։
Նշենք, որ սոցցանցերում լուրեր էին տարածվել, թե Հայաստանում «Վագներ» մասնավոր ռազմական կազմակերպության 3 հազար մարտիկ է գտնվում, որոնք իբր տեղի ուժերի աջակցությամբ պետք է հեղաշրջում իրականացնեն և հեռացնեն վարչապետ Նիկոլ Փաշինյանին։
