Նիգերի բանակի հրամանատարությունն աջակցություն է հայտնել երկրում տեղի ունեցած ռազմական հեղաշրջմանը
Նիգերի բանակի հրամանատարությունն աջակցություն է հայտնել հուլիսի 26-ին նախագահի պահակախմբի զինվորների իրականացրած հեղաշրջմանը՝ նշելով, որ իր համար առաջնայինը երկրում իրավիճակի ապակայունացումից խուսափելն է, այս մասին հաղորդում է Reuters-ը։
Բանակի հրամանատարության հայտարարությունում նաև նշված է, որ հարկավոր է պաշտպանել նախագահ Մոհամեդ Բազումին և նրա ընտանիքին և խուսափել արյունալի առճակատումից։
Հեղաշրջման հարյուրավոր աջակիցներ հավաքվել են մայրաքաղաք Նիամեյում Ազգային ժողովի շենքի առաջ։
Reuters-ը նշում է, որ 2020 թ․-ից ի վեր սա Արևմտյան և Կենտրոնական Աֆրիկայում արդեն 7-րդ հեղաշրջումն է։
Նիգերի զինվորականները պետական հեռուստաընկերության եթերում հայտարարել են հեղաշրջման, բոլոր հաստատությունների աշխատանքի դադարեցման և երկրի սահմանները փակելու մասին։ Մինչ այդ հաղորդվում էր, որ Նիգերի նախագահ Բազումը հուլիսի 26-ի առավոտից պահվում է նախագահական պալատում։
