Մերկելը և Մակրոնը պահանջում են ազատ նավագնացություն ապահովել Կերչի նեղուցում
Գերմանիայի կանցլեր Անգելա Մերկելը եւ Ֆրանսիայի նախագահ Էմանուել Մակրոնը հերթական անգամ հանդես են եկել Կերչի նեղուցով նավերի ազատ անցումն ապահովելու եւ ուկրաինացի նավաստիներին ազատելու պահանջով: Համատեղ հայտարարության տեքստը դեկտեմբերի 28-ին Բեռլինում կայացած բրիֆինգում ընթերցել է ԳԴՀ-ի նախարարների կաբինետի ներկայացուցիչ Ուլրիկե Դեմերը՚
«Մենք Կերչի նեղուցով ազատ ու անարգել անցում ենք պահանջում բոլոր նավերի համար, ինչպես նաեւ անօրինականորեն ձերբակալված նավաստիների անվերապահ ազատում»,-ասված է հայտարարության մեջ: Նախագահի եւ կանցլերի կարծիքով, նավաստիները պետք է առաջիկա տոները դիմավորեն ընտանիքի շրջապատում: Մերկելը եւ Մակրոնը հերթական անգամ անհանգստություն են հայտնել նեղուցում «ռազմական ուժի կիրառման» կապակցությամբ:
Նոյեմբերի 25-ին Ուկրաինայի ռազմածովային ուժերի երեք նավեր խախտել են ՌԴ-ի տարածքային ջրերով անցնելու կարգը Սեւ ծովից Ազովի ծով նավարկելիս: Նավերը կալանվել են զենքի կիրառմամբ, իսկ անձնակազմի 24 անդամներ Սիմֆերոպոլի դատարանի կողմից ձերբակալվել են ՌԴ-ի պետական սահմանն անօրինականորեն հատելու մեղադրանքով, հաղորդել է ՏԱՍՍ-ը:
