ԱՄՀ-ն 1,4 մլրդ դոլարի առաջին վարկաբաժինը փոխանցեց Ուկրաինային
Ուկրաինան Արժույթի միջազգային հիմնադրամից (ԱՄՀ) 1,4 միլիարդ դոլարի վարկաբաժին է ստացել: Դեկտեմբերի 21-ին այս մասին հայտնել է Ուկրաինայի Ազգային բանկի մամուլի ծառայությունը:
«Ուկրաինան stand-by ծրագրի պայմաններով առաջին վարկաբաժինն ստացել է Արժույթի միջազգային հիմնադրամի հետ համագործակցության նոր ծրագրով, որն ԱՄՀ-ի տնօրենների խորհուրդն ընդունել է 2018 թվականի դեկտեմբերի 18-ին»,- տեղեկացրել է կարգավորիչը: Արժույթի միջազգային հիմնադրամի տնօրենների խորհուրդը դեկտեմբերի 18-ին հաստատել է Ուկրաինայի համար 3,9 միլիարդ դոլարի stand-by ֆինանսավորման նոր ծրագիրը, որը նախատեսված է 14 ամսվա համար:
Հիմնադրամը դա արել է սոսկ այն բանից հետո, երբ երկրի կառավարությունը համաձայնեց 23,5 տոկոսով բարձրացնել գազի գները: Ըստ էության, այն փոխարինել է ընդլայնված ֆինանսավորման քառամյա ծրագրին, որը նախատեսված էր 17,5 միլիարդ դոլարի չափով եւ ավարտվում է 2019 թվականի մարտին: Դրա գործողության ընթացքում Ուկրաինան ԱՄՀ-ից ստացել է շուրջ 8,4 միլիարդ դոլար, վերջին վարկաբաժինը եղել է անցյալ 2017 թվականի ապրիլին, հաղորդել է ՏԱՍՍ-ը:
