«Լույս» դաշինքն Աջափնյակի վթարային շենքերի խնդրի լուծումը տեսնում է վերաբնակեցման հիմնադրամի ստեղծմամբ
Երևանի ավագանու ընտրություններին մասնակից «Լույս» դաշինքի նախընտրական շտաբի ղեկավար Դավիթ Խաժակյանը Երևանի Աջափնյակ վարչական շրջանի վթարային շենքերի լուծման միակ ճանապարհը համարում է վերաբնակեցման հիմնադրամի ստեղծումը։ «Աջափնյակ վարչական շրջանում առկա են երրորդ կարգի վթարային շենքեր, որոնք թվով 64 են։ «Լույս» դաշինքն առաջարկում է այս խնդիրը լուծելու ծրագիր, որը ենթադրում է երեք տեսակի ֆինանսական մուտքեր` համայնքային, պետական և մասնավոր»,- Երևանի ավագանու ընտրությունների քարոզարշավի ժամանակ հայտարարեց Դավիթ Խաժակյանը։ Նրա հավաստմամբ` «Լույս»-ի նպատակն է կառուցել բազմաբնակարան շենքերի թաղամաս, որտեղ կբնակվեն այդ շենքերի բնակիչները։
«Լույս» դաշինքն առաջարկում է նաև վերելակների հիմնանորոգման, Ֆիզիկայի ինստիտուտի խաչմերուկում և Գևորգ Չավուշի արձանի մոտ մետրոպոլիտենի երկու կայարանի կառուցման ծրագիր։ «Մետրոպոլիտենի «Գործարանային» կայանը քիչ է օգտագործվում։ Մենք առաջարկում ենք իրականացնել երկարաժամկետ, բայց արդյունավետ ծրագիր»,-հավելեց Դավիթ Խաժակյանը։
Սեպտեմբերի 10-ին մեկնարկել է Երևանի ավագանու արտահերթ ընտրությունների քարոզարշավը, որը կշարունակվի մինչև սեպտեմբերի 21-ը: Առաջիկա 11 օրերի ընթացքում Երևանի ավագանու ընտրությունների մասնակից քաղաքական ուժերը երևանցիներին կներկայացնեն իրենց նախընտրական ծրագրերը, հանդես կգան Երևանի խնդիրներին լուծում տալու սեփական տեսլականով: Երևանի ավագանու արտահերթ ընտրություններին մասնակցում է 12 քաղաքական ուժ:
Երևանի ավագանու ընտրությունների մասնակցելու համար Կենտրոնական ընտրական հանձնաժողովում գրանցվել են «Բարգավաճ Հայաստան», «Ժառանգություն», ՀՅԴ, «Հայք», «Երկիր ծիրանի», «Ռեֆորմիստների», «Ժողովրդավարական ուղի», «Օրինաց երկիր» կուսակցությունները, «Իմ քայլը», «Երևանցիներ», «Երևանի հանրություն», «Լույս» դաշինքները:
