TOI․ Թրամփը Նեթանյահուին հավաստիացրել է, որ Իրանի հետ համաձայնագիրը լիովին կվերացնի նրա միջուկային ծրագիրը
ԱՄՆ նախագահ Դոնալդ Թրամփն անցած գիշեր ունեցած հեռախոսազրույցում վարչապետ Բենիամին Նեթանյահուին հավաստիացրել է, որ Իրանի հետ վերջնական համաձայնագիրը լիովին կվերացնի Թեհրանի միջուկային ծրագիրը, հայտնում է Times of Israel-ը՝ հղում անելով իսրայելցի ոմն պաշտոնյայի։
Թրամփը «պարզաբանել է, որ բանակցություններում հաստատակամորեն պնդելու է Իրանի միջուկային ծրագրի կասեցման և ամբողջ հարստացված ուրանի՝ Իրանի տարածքից դուրսբերման վերաբերյալ իր վաղեմի պահանջը, և որ չի ստորագրի վերջնական համաձայնագիրը, եթե այդ պայմանները չկատարվեն», պատմել է գործակալության զրուցակիցը։
Վաշինգտոնը Երուսաղեմին տեղյակ է պահում բանակցությունների ընթացքին «փոխըմբռնման հուշագրի շուրջ, որպեսզի կրկին բացվի Հորմուզի նեղուցը և սկսվեն վերջնական համաձայնագրի վերաբերյալ բանակցություններ այն հարցերի շուրջ, որոնք մնում են վիճահարույց», նշել է աղբյուրը՝ հավելելով, որ Նեթանյահուն շնորհակալություն է հայտնել Թրամփին Իսրայելի անվտանգության հանդեպ նրա «բացառիկ նվիրվածության» համար։
Իր հերթին Նեթանյահուն Թրամփին ասել է, որ Իսրայելը կպահպանի գործողությունների ազատությունը «բոլոր սպառնալիքների դեմ՝ բոլոր ճակատներում», ասել է գործակալության զրուցակիցը։
«Վարչապետը շեշտել է, որ Իսրայելը կպահպանի իր գործողությունների ազատությունը բոլոր ճակատներում առկա սպառնալիքների դեմ, ներառյալ Լիբանանը, և նախագահ Թրամփը հաստատել է իր աջակցությունն այս սկզբունքին», – հավելել է աղբյուրը։
