Իրանում սպառնացել են, որ իրենց պահանջները չընդունելու դեպքում ԱՄՆ-ին նոր պարտություններ են սպասվում
ԱՄՆ-ին նոր պարտություններ են սպասվում մարտի դաշտում, եթե երկիրը չընդունի Իրանի օրինական պահանջները հակամարտության կարգավորման հարցում: Այս մասին հայտարարել է Իրանի պաշտպանության նախարարության պաշտոնական ներկայացուցիչ գեներալ Ռեզա Թալայինիկը։
«Եթե հակառակորդը չընդունի Իրանի ժողովրդի օրինական և որոշակի պահանջները դիվանագիտական ոլորտում, ապա նա պետք է սպասի մարտի դաշտում իր պարտությունների կրկնությանը։ Հակառակորդի կողմից ցանկացած նոր սպառնալիք, հարձակում կամ ագրեսիա միանշանակ կհանդիպի անհապաղ, վճռական և վերջնական պատասխանի, որը նրան կստիպի զղջալ», – նրա խոսքը մեջբերել է IRNA գործակալությունը։
Ռեզա Թալայինիկը նշել է, որ Իրանի ժողովուրդն ապագայում ևս կմնա այս «պարտադրված պատերազմի» հաղթողը։ Նա նաև նշել է, որ հակամարտության գոտուց ամերիկյան նավերի «փախուստի» բազմաթիվ դեպքերը իրանական բանակի և Իսլամական հեղափոխության պահապանների կորպուսի մարտունակության և «կոշտ պատասխան» տալու նրանց պատրաստակամության վկայությունն են, որի համար հակառակորդը կզղջա»։
Մայիսի 10-ին Իրանը Պակիստանին է փոխանցել ԱՄՆ-ի հետ հակամարտության կարգավորման շուրջ ամերիկյան առաջարկի պատասխանը։ ԱՄՆ նախագահ Դոնալդ Թրամփը Թեհրանի պատասխանը որակել է «անընդունելի»։
