Թրամփը պատրաստվում է պատժել եվրոպական երկրներին. Politico
ԱՄՆ նախագահ Դոնալդ Թրամփի վերջին որոշումները ամրապնդել են եվրոպական երկրներին «պատժելու» նրա ցանկությունը. ամերիկյան առաջնորդի վարչակազմի և եվրոպացի գործընկերների միջև տարաձայնությունները սկսում են անհաշտ թվալ։ Այս մասին գրում է Politico–ն:
Ավելի վաղ Թրամփը հայտարարել էր, որ մտադիր է հաջորդ շաբաթվանից 25 %-ի չափով մաքսատուրքեր սահմանել ԵՄ-ից ավտոմեքենաների ու բեռնատարների համար՝ պատճառաբանելով, որ Եվրամիությունը չի կատարում ԱՄՆ-ի հետ առևտրային պայմանավորվածությունները: Բացի այդ, Պենտագոնի պաշտոնական ներկայացուցիչը հաստատել է պատերազմի նախարարության որոշումը մեկ տարվա ընթացքում Գերմանիայից 5 հազար ամերիկացի զինծառայողների դուրս բերելու մասին։
«Թրամփը ներկայում ավելի շատ շահագրգռված է պատժել եվրոպական տերություններին, քան համագործակցել նրանց հետ», – ասված է հրապարակման մեջ:
Լրատվամիջոցը գրում է, որ ԱՄՆ նախագահի վարչակազմի և եվրոպացի գործընկերների միջև տարաձայնություններն անլուծելի են դառնում։ Թրամփի պահվածքը եվրոպացիներին պարզ ցույց է տվել, որ անհրաժեշտ է լինել Վաշինգտոնից անկախ։ Սակայն եվրոպացի քաղաքական գործիչները խոստովանում են, որ ԱՄՆ-ից կախվածության նվազեցման գործընթացը դանդաղ է ընթանում։
Politico–ն նշում է, որ եվրոպական որոշ առաջնորդներ սկսել են հարմարվել նոր իրողություններին, քանի որ կարծում են, որ ամենավատն արդեն տեղի է ունեցել. եվրոպացի քաղաքական գործիչները շողոքորթել են ամերիկյան առաջնորդին, «մարսել են» բարձր մաքսատուրքերը և պարտավորվել են բարձրացնել պաշտպանական ծախսերը, քանի որ կարծում էին, որ դա «այն գինն է, որը վճարում են», որպեսզի Թրամփի ուշադրությունը կենտրոնացած մնա ուկրաինական հակամարտության վրա:
