Իրանն ակտիվացրել է ստորգետնյա պահեստներից զինամթերք դուրս բերելու ջանքերը. NBC News
Իրանի զինված ուժերը վերջին օրերին արագացրել են ծախսված հրթիռների պաշարների համալրումը՝ ստորգետնյա պահեստներից պաշարներ դուրս բերելով, որպեսզի ապահովեն արագ արձագանքելու հնարավորությունը, եթե ԱՄՆ-ը վերսկսի ռազմական գործողությունները, հաղորդել է NBC News-ը՝ հղում կատարելով իրավիճակին ծանոթ պաշտոնյաներին։
Նրանք նշել են, որ Իրանը ԱՄՆ-ի հետ հրադադարն օգտագործում է ստորգետնյա պահեստներից հրթիռներ և այլ զինամթերք դուրս բերելու համար, այդ թվում՝ այն պահեստներից, որոնց մուտքերը փլատակներով փակվել էին ԱՄՆ վերջին ավիահարվածների ընթացքում։
Աղբյուրների խոսքով՝ ԱՄՆ-ը կարծում է, որ Իրանի իշխանությունները ցանկանում են արագ վերականգնել անօդաչու թռչող սարքեր և բալիստիկ հրթիռներ արձակելու իրենց հնարավորությունները, որպեսզի կարողանան հարվածներ հասցնել ամբողջ Մերձավոր Արևելքում։
«Վերջին օրերին Իրանը միայն արագացրել է իր հրթիռներն ու այլ զինամթերքը դուրս բերելու ջանքերը, քանի որ պատերազմի վերսկսման հավանականությունն աճում է դրա դադարեցման շուրջ ակնհայտորեն փակուղի մտած բանակցությունների ֆոնին»,- ընդգծել են պաշտոնյաները՝ նշելով, որ դեռևս մարտական գործողությունների սկսվելուց առաջ Իրանը մեծ քանակությամբ բալիստիկ հրթիռներ և արձակման կայանքներ էր թաքցրել գետնի տակ։
