Ինդոնեզիայում գնացքների բախման հետևանքով 14 մարդ զոհվել է, 80-ից ավելին՝ վիրավորվել
Ինդոնեզիայի մայրաքաղաք Ջակարտայի մոտակայքում գտնվող Բեկասի քաղաքում գնացքների բախման հետևանքով զոհերի թիվը հասել է 14-ի, ևս 84 մարդ վիրավորվել է։
Ինչպես տեղեկանում ենք Reuters-ից, այս մասին ապրիլի 28-ին փրկարարական աշխատանքների ավարտից հետո հայտնել է Ինդոնեզիայի PT KAI պետական երկաթուղային ընկերության գործադիր տնօրեն Բոբի Ռասիդինը։
Միջքաղաքային և մեծ հեռավորությամբ մեկնող գնացքների բախումը տեղի է ունեցել ապրիլի 27-ի ուշ երեկոյան։
Ինդոնեզիայի որոնողափրկարարական գործակալության ղեկավար Մոհամմադ Սյաֆիին հայտարարել է, որ վթարի հիմնական հարվածը կրել է կանանց համար նախատեսված վագոնը. բոլոր զոհերը կանայք են։
Ինդոնեզիայի նախագահ Պրաբովո Սուբիանտոն հայտարարել է, որ համաձայնել է երկաթգծի մոտ կառուցել էստակադա՝ երթևեկության լուրջ խցանումները կարգավորելու համար։ Նա հավելել է, որ իշխանությունները կհետաքննեն բախումը: Նախագահը նաև նշել է, որ երկաթուղային ցանցի մեծ մասը լավ վիճակում չէ:
Reuters-ը հիշեցնում է, որ աշխարհի ամենախիտ բնակեցված քաղաքում՝ Ջակարտայում, միջքաղաքային գնացքները ամենածանրաբեռնվածներից են, և վթարներ հաճախակի են տեղի ունենում։
