Երբ Նիկոլը խմբագիր էր, հղում էր անում օդում կախված լուրերին, hիմա` նման հղումների համար հատուկ հիմնարկներ ունի. Միհրան Հակոբյան
Պատմաբան, վերլուծաբան Միհրան Հակոբյանը գրում է. «Երբ Նիկոլը խմբագիր էր, իսկ հետո պատգամավոր, հղում էր անում օդում կախված լուրերին: Հիմա Նիկոլը նման հղումների համար հատուկ հիմնարկներ ունի: Նիկոլն, օրինակ, ԱԱԾ անունից անձի՝ գործակալ լինելու մասին կեղծ տեղեկանք է հրապարակում… Նիկոլը նաև «արտաքին հետախուզության ծառայություն» անվամբ մի կրպակ ունի, որի անունից նույն ոճի կեղծիք է հրապարակում և դրա վրա հղումներ անում: Թե բա՝ հասեք, հիբրիդայինները վրա են տվել…
Ի՞նչ է Նիկոլը և ի՞նչ է Նիկոլի ուզածը, բոլորի համար պարզ է: Այ թե ի՞նչ է ուզում դիկտատորի տնազի ընտրական ֆարսին մասնակցել պատրաստվող ընդդիմությունը, հասկանալի չէ: Ավելի շուտ՝ պարզաբանման կարիք կա. ընդդիմադիրները ցանկանում են Նիկոլի խորհրդարանում «ընդդիմություն», նույն ինքը՝ բոքսի տանձիկ աշխատե՞լ, թե՞ պատրաստվում են Նիկոլից մաքրել երկիրը:
Այս հարցից ընդդիմադիրները խուսափել չեն կարող: Չեն կարող, որովհետև Հայաստանի քաղաքական դաշտի թիվ մեկ դիֆիցիտ ապրանքն ազնվությունն է ու մարդիկ ազնվության կարիք ունեն, ազնիվ խոսքի կարիք ունեն:
Մարդիկ նաև հավ չեն, որ հավատան ընդդիմադիրների «կտերին», թե ընտրության ճանապարհով հնարավոր է ազատվել արևմտյան տերերի հովանոցի տակ ծվարած Նիկոլից ու նրա ստեղծած ախոռապետությունից: Մարդիկ տեսել են, թե ինչպես են ընդդիմադիրները 2021-ի ընտրությանը «գցել ոտքերին» ու հասկանում են, որ 2026-ի հունիսին ավելի ծանր ձևով են «գցելու ոտքերին»:
Այնպես որ՝ ընտրությանը պատրաստվող ընդդիմությունը պետք է հստակ պատասխանի. եթե իր նպատակը ոչ թե խորհրդարանում Նիկոլի մոտ չուչել աշխատելն է, այլ Նիկոլին լարելն է, ապա ինչ գործողություն կամ գործողությունների շարք է առաջարկում ժողովրդին: Այս պահին կա փողոց+իմպիչմենտ սցենարը:
Եթե սա չէ ճանապարհը, ապա ո՞րն է: Սա պետք է պարզաբանեն ընդդիմադիրները, որովհետև «կատվի խաղը մինչև մարագն է», իսկ ազնվության դիֆիցիտով հեռու վազել չի ստացվելու»:
