Լուիզիանայի քննչական մեկուսարանից 8 վտանգավոր բանտարկյալ է փախել
Ամերիկյան Լուիզիանա նահանգի քննչական մեկուսարանից ութ բանտարկյալ է փախել, հաղորդում է WAFB9-ը։
Երեքին հաջողվել է բռնել։
Իրավապահ մարմինների տվյալներով, փախածների մեջ կան մարդիկ, որոնք անցնում են ծանր հանցագործությունների գործերով, ներառյալ սպանությունները Արեւելյան Բատոն-Ռուժ շրջանում։
Իշխանությունները հայտնել են, որ փախածների մի մասը նախկինում ձերբակալվել էր սպանությունների և այլ բռնի հանցագործությունների հետ կապված քննությունների շրջանակում։ Մասնավորապես, նրանցից չորսը՝ Դեստին Բրոուգանը, Քոլին Լունին, Քևին Սլոթերը և Տրենտոն Թապլինը, անցնում են Արեւելյան Բատոն-Ռուժի հետ կապված քրեական գործերում։
Տրենտոն Թապլինը ձերբակալվել էր 2020 թվականի հունիսին՝ փոխհրաձգության պատճառով, որի արդյունքում զոհվել էր 29-ամյա տղամարդ և վիրավորվել երիտասարդ կին։ Դեստին Բրոուգանը ձերբակալվել էր 2022 թվականին՝ սպանության մեղադրանքով, որը կատարել էր 18 տարեկանում։ Քոլին Լունին սկզբում անցնում էր ապօրինի ներթափանցման գործով, իսկ հետո նրա դեմ առաջադրվել էր երկրորդ աստիճանի սպանության մեղադրանք։ Քևին Սլոթերը նախկինում բազմիցս ձերբակալվել էր թմրանյութերի, կողոպուտների և ընտանեկան բռնության հետ կապված մեղադրանքներով։
Փախածների շարքում են նաև Կրիզեան Սալինասը և Կոպլելոն Վիկները, որոնք նույնպես որոնվում են․ նրանց քրեական գործերի մանրամասները պաշտոնական հաղորդագրություններում չեն նշվում։ Որոնողական գործողությանը ներգրավվել են նահանգի մի քանի իրավապահ կառույցներ։
Ոստիկանությունը զգուշացնում է տարածաշրջանի բնակիչներին չփորձել ինքնուրույն ձերբակալել փախածներին և խնդրում է անմիջապես հայտնել ցանկացած տեղեկություն, որը կարող է օգնել նրանց բռնելուն։
