Դատելով Թրամպի հայտարարություններից՝ Իրանին հարվածը թերևս անխուսափելի է. Հակոբ Բադալյան
Քաղաքական վերլուծաբան Հակոբ Բադալյանը Թելեգրամի իր ալիքում գրում է. «Ռոյթերզը, հղում անելով եվրոպական անանուն պաշտոնյայի, հայտնում է, որ ԱՄՆ առաջիկա 24 ժամերի ընթացքում կարող է հարվածել Իրանին: Դատելով Թրամպի հայտարարություններից՝ Իրանին հարվածը թերեւս անխուսափելի է: Թրամպը ըստ էության չի թողել չհարվածելու տեղ: Այլ հարց է, թե ինչպիսին է լինելու հարվածը:
Մեծ հավանականությամբ, այն կլինի այսպես ասած ձեւական, դեմքը փրկելու համար արվող հարված: Թրամպը ըստ ամենայնի կհարվածի այնպիսի թիրախի, որը Իրանի համար չի լինի լուրջ խնդիր, իսկ Թրամպին թույլ կտա ասել հակառակը՝ թե շատ խիստ պատժել է Իրանին: Հնարավոր է, որ Իրանն էլ իր հերթին հետո ինչ որ հարված կհասցնի ԱՄՆ որեւէ ռազմակայանի, ինչպես 12-օրյա պատերազմից հետո ի պատասխան ԱՄՆ հարվածի՝ ինքն էլ թիրախավորեց Կատարում ԱՄՆ ռազմակայանը: Հետո Թրամպը շնորհակալություն հայտնեց Իրանին, նախապես հարվածի մասին իրազեկելու համար:
Սա իհարկե թատրոնի մասին չէ, պարզապես փոխադարձ շահագրգռության: Թե Իրանի, թե Թրամպը չունեն իրավիճակի լարման շահագրգռություն: Փորձեցին հերթական անգամ ճոճել Իրանը: Իրանը ճոճվեց, բայց մնաց «ոտքի վրա»: Ի՞նչ գնով, սա իհարկե հարցի այլ կողմ է:
Բայց, ինչպես ասում են՝ «մինչ հաջորդ հանդիպում»:
Իհարկե սա իմ դիտարկումն է, որը կառուցում եմ այսպես ասած ողջախոհությանն ապավինելով: Նախօրեին ես խոսեցի ԱՄՆ ազգային հետախուզական ծառայության ղեկավար Թուլսի Գաբարդի՝ Իրանի հարցում գոնե առայժմ կարծես թե հրապարակային լռության մասին, նրան դիտարկելով Թրամպի վարչակազմի «բանականության ձայն»: Եթե Գաբարդը հրապարակավ լուռ է, ապա գուցե այն պատճառով, որ առայժմ չի տեսնում իրավիճակի այնպիսի զարգացման ռիսկ, որը կարող է ստեղծել մեծ ապակայունացում»:
