Պատմական հուշարձանների պահպանման խումբը դատի է տվել Սպիտակ տանը՝ պարահանդեսային դահլիճի կառուցման համար
ԱՄՆ Կոնգրեսի կողմից պատմական հուշարձանների պահպանմանը նպաստելու լիազորություն ստացած ոչ առևտրային կազմակերպությունը դատական հայց է ներկայացրել Սպիտակ տան դեմ՝ ԱՄՆ նախագահ Դոնալդ Թրամփի համար նոր պարահանդեսային դահլիճի շինարարությունը դադարեցնելու համար, հաղորդում է BBC News-ը։
Պատմական արժեքների պահպանման ազգային հիմնադրամը ուրբաթ դատական հայց է ներկայացրել՝ պնդելով, որ Սպիտակ տունը չի անցկացրել անհրաժեշտ ստուգումներ՝ հոկտեմբերին պատմական Արևելյան թևի քանդումից առաջ։
«Ոչ մի նախագահի օրենքով թույլատրված չէ քանդել Սպիտակ տան առանձին հատվածներ՝ առանց որևէ քննարկման. ո՛չ նախագահ Թրամփին, ո՛չ նախագահ Ջո Բայդենին, ո՛չ էլ որևէ մեկին», – ասվում է հայցում։
Հայցը սրահի նախագծի դեմ առաջին լուրջ իրավական մարտահրավերն է։ Կազմակերպությունը Վաշինգտոնի դաշնային դատարանից պահանջում է կասեցնել կցակառույցի շինարարությունը, մինչև Սպիտակ տունը «չկատարի օրենքի պահանջները՝ անցնելով օրենքով սահմանված ստուգման ընթացակարգերը», ներառյալ հանրային քննարկման ժամանակաշրջանը, ասվում է հայտարարության մեջ։
Կազմակերպությունը հայտարարել է, որ «ստիպված է» դատարան դիմել այն բանից հետո, երբ Սպիտակ տունը անտեսել է հոկտեմբերին իր կողմից բարձրացված մտահոգությունները։
Իր հայցում այն պնդում է, որ Սպիտակ տունը խախտել է օրենքը՝ շինարարությունը սկսելով առանց Կապիտալ պլանավորման ազգային հանձնաժողովին նախագծերը ներկայացնելու, նախագծի շրջակա միջավայրի գնահատումը իրականացնելու և Կոնգրեսի թույլտվությունը ստանալու։
Պնդվում է նաև, որ Թրամփը խախտում է ԱՄՆ Սահմանադրությունը, «որը Կոնգրեսին է թողնում Միացյալ Նահանտներին պատկանող գույքի տնօրինման և դրա վերաբերյալ բոլոր կանոնների սահմանման իրավունքը»։
Ուրբաթ օրը ի պատասխան հայցի հրապարակված Սպիտակ տան հայտարարության մեջ ասվում է, որ «Նախագահ Թրամփն ունի բոլոր օրինական լիազորությունները՝ արդիականացնելու, նորացնելու և զարդարելու Սպիտակ տունը, ճիշտ այնպես, ինչպես դա արել են նրա բոլոր նախորդները»։
Արևելյան թևը քանդվել է հոկտեմբերին, որպեսզի տեղ հատկացվի մի քանի միլիոն դոլար արժողությամբ պարահանդեսային սրահին, որի համար, ըստ Թրամփի, վճարում են մասնավոր դոնորները։ Այդ ժամանակից ի վեր առաջարկվող նախագիծը 500 հոգանոց տարողությամբ սրահից ընդլայնվել է մինչև 1350 հյուր տեղավորելու ունակ տարածքի։
