3-ական րոպե հանգիստ. ինչ նորամուծություն է սպասվում ԱԱ-2026-ին
2026 թվականի աշխարհի առաջնության ժամանակ ֆուտբոլիստները յուրաքանչյուր խաղում երկու լրացուցիչ ընդմիջում կունենան՝ ջրային մակարդակը վերականգնելու համար։
Այս մասին ՖԻՖԱ-ի պաշտոնական կայքին տված հարցազրույցում հայտնել է մրցաշարի գլխավոր համակարգող Մանոլո Զուբիրիան։
Լրացուցիչ ընդմիջումները կտևեն 3-ական րոպե։ Հատկանշական է, որ դրանք կրելու են պարտադիր բնույթ և կախված չեն լինելու եղանակային պայմաններից, հանդիպման վայրից կամ ժամից։
Հիշեցնենք, որ ԱԱ-2026-ը կանցկացվի հաջորդ տարի ամռանը երեք երկրում՝ ԱՄՆ-ում, Կանադայում և Մեքսիկայում։ Մրցաշարի մեկնարկային հանդիպումը կկայանա հունիսի 11-ին, իսկ եզրափակիչը՝ հուլիսի 19-ին։ Պատմության մեջ առաջին անգամ մրցաշարին կմասնակցի 48 ազգային հավաքական։
