Ռուսական սառեցված ակտիվների բռնագրավմшն վերաբերյալ որոշումը կկայացվի դեկտեմբերի 18-ին
Ռուսաստանի սառեցված ակտիվների բռնագրավման վերաբերյալ որոշումը, հավանաբար, կկայացվի Բրյուսելում դեկտեմբերի 18-ին կայանալիք ԵՄ գագաթնաժողովում, հայտարարել է Ֆրանսիայի արտաքին գործերի նախարար Ժան-Նոել Բարոն՝ Ռիա Նովոստիի փոխանցմամբ:
«Եվրոպական օրենսդրության համաձայն՝ որևէ որոշում չի կարող կայացվել առանց մեր մասնակցության: Սա վերաբերում է Եվրոպայում սառեցված ռուսական ակտիվներին: Այս ամենը կլինի առաջիկա օրերին քննարկումների առարկա, որոնք, հուսով ենք, կհանգեցնեն դեկտեմբերի 18-ին Եվրոպական խորհրդում կայացվող որոշման», – ասել է նա:
Հիշեցնենք, որ Եվրամիությունը և G7 երկրներն արգելափակել են Ռուսաստանի արժութային պահուստների մոտավորապես կեսը: ԵՄ-ում պահվում է ավելի քան 200 միլիարդ եվրո, հիմնականում՝ Euroclear-ի հաշիվներում, որը աշխարհի ամենամեծ կլիրինգային և հաշվարկային համակարգերից մեկն է, որի գլխավոր գրասենյակը գտնվում է Բելգիայում:
Բրյուսելը, որը խոստացել էր աջակցել Կիևին այնքան ժամանակ, որքան անհրաժեշտ է, սպառել է բոլոր հասանելի ռեսուրսները, և ԵՄ անդամները պատրաստ չեն միջոցներ հատկացնել իրենց սեփական բյուջեից: Այս ֆոնին Եվրոպական հանձնաժողովը ձգտում է ստանալ Բելգիայի համաձայնությունն ակտիվներն օգտագործելու համար:
