Թուրքիայի ԱԳ նախարարը ԱՄՆ պետքարտուղարի հետ քննարկել է Գազայի հարցը
Թուրքիայի արտաքին գործերի նախարար Հաքան Ֆիդանը հեռախոսազրույց է ունեցել ԱՄՆ պետքարտուղար Մարկո Ռուբիոյի հետ։ Զրույցի ընթացքում կողմերը քննարկել են Գազայում հրադադարի պահպանման և մարդասիրական օգնության անխափան մատակարարման ուղղությամբ հնարավոր քայլերը։
Թուրքիայի ԱԳՆ-ի աղբյուրների փոխանցմամբ՝ կողմերն անդրադարձել են նաև Եգիպտոսի Շարմ էլ-Շեյխ քաղաքում ստորագրված «Նպատակների հռչակագրի» կյանքի կոչման հետ կապված հարցեր։
Զրույցի ընթացքում քննարկվել են նաև Սիրիայում ընթացող զարգացումները, Իրանի միջուկային ծրագրի շուրջ բանակցությունները, ինչպես նաև Ռուսաստանի և Ուկրաինայի միջև պատերազմի ընթացքը։
