Հնդկաստանը Ռուսաստանից լրացուցիչ С-400 ՀՕՊ համակարգեր կգնի. Hindustan
Հնդկաստանն ուզում է Ռուսաստանից լրացուցիչ 5 խմբաքանակ С-400 զենիթահրթիռային համալիրներ գնել. բանակցությունների ամսաթիվն արդեն նշանակվել է։ Այս մասին հայտնում է Hindustan Times թերթը՝ հղում անելով պաշտպանական շրջանակներից իր աղբյուրներին:
«Հնդկաստանի պաշտպանության նախարարության բարձրագույն ղեկավարությունն այս շաբաթ կհանդիպի ռուս գործընկերների հետ, որպեսզի քննարկի Մոսկվայից ևս հինգ С-400 զենիթահրթիռային համալիրների ուղղակի գնման կամ համատեղ արտադրության հնարավորությունը՝ Հնդկաստանի հեռահար պաշտպանական ներուժի ամրապնդման նպատակով»,-ասվում է հաղորդագրության մեջ:
Բանակցությունների ընթացքին ծանոթ աղբյուրները պարբերականին հայտնել են, որ կողմերն արդեն սկզբունքային պայմանավորվածություն են ձեռք բերել լրացուցիչ համակարգերի արժեքի վերաբերյալ:
Ըստ India TV-ի` վերջնական պայմանավորվածությունները դեռ պետք է ձեռք բերվեն, բայց, հավանաբար, հինգ համակարգերից երեքը կգնեն ուղղակիորեն, իսկ մյուս երկուսը կարող են արտադրել Հնդկաստանի մասնավոր ընկերությունները՝ տեխնոլոգիայի փոխանցման համաձայնագրով:
Սպասվում է, որ նոր С-400 համակարգերի վերաբերյալ գործարքը կավարտվի նախքան ՌԴ նախագահ Վլադիմիր Պուտինի Հնդկաստան այցը, որը սպասվում է դեկտեմբերին:
Հնդկաստանի ՊՆ-ն ավելի վաղ հայտարարել էր, որ հենց ռուսական С-400-ներն են հիմնական դեր խաղացել Պակիստանի հետ մայիսյան հակամարտության ժամանակ հնդկական տարածքները պաշտպանելու գործում:
«Триумф»–ները խոցման բարձր ճշգրտություն են ցույց տվել՝ հետ մղելով պակիստանյան հրթիռների և անօդաչու թռչող սարքերի գրոհները։ «Военное обозрение» պարբերականի տվյալներով՝ հենց այս հակամարտությունից հետո են հնդիկները նախնական բանակցություններ սկսել նոր համակարգերի մատակարարման շուրջ։
Դեռևս 2018-ին Հնդկաստանը С-400-ների հինգ գնդային հավաքածու էր գնել և տեղակայել էր դրանք Պակիստանի և Չինաստանի հետ սահմաններին:
