FT․ ԵՄ-ն արագացնում է եվրոպական ԱԲ-ի ստեղծումը՝ ԱՄՆ-ից և Չինաստանից կախվածությունից խուսափելու համար
Եվրամիությունը ակտիվացնում է սեփական արհեստական բանականության հարթակների ստեղծման ջանքերը՝ նպատակ ունենալով նվազեցնել կախվածությունը օտարերկրյա մատակարարներից։ Բրյուսելը պատրաստվում է ներկայացնել նոր ռազմավարություն, որը պետք է թույլ տա Եվրոպային մրցել ԱՄՆ-ի և Չինաստանի հետ՝ ԱԲ ոլորտում առաջնորդության համար գլոբալ մրցավազքում։
Financial Times-ի ուսումնասիրած փաստաթղթի նախագծի համաձայն, Եվրահանձնաժողովի նոր նախաձեռնությունը, որը կրում է «Apply AI» անվանումը, ուղղված է Եվրոպայում մշակված արհեստական բանականության գործիքների առաջխաղացմանը։ Նպատակը՝ ամրապնդել ԵՄ-ի անվտանգությունը, կայունությունը և արդյունաբերական մրցունակությունը։ Հատուկ ուշադրություն է նախատեսվում դարձնել ԱԲ-ի կիրառմանը առողջապահության, պաշտպանության և արտադրության ոլորտներում։
Եվրահանձնաժողովը մտադիր է «ամրապնդել ԵՄ-ի ինքնիշխանությունը արհեստական բանականության ոլորտում»՝ արագացնելով եվրոպական ծագում ունեցող տեխնոլոգիաների մշակումը և ներդրումը։ Փաստաթղթում նշվում է, որ անհրաժեշտ է ակտիվորեն ներդնել «մասշտաբավորվող և վերարտադրելի գեներատիվ լուծումներ» պետական կառավարման մեջ։ Ռազմավարությունը պաշտոնապես կներկայացնի թվային տեխնոլոգիաների հարցերով հանձնակատար Հեննա Վիրկունենը՝ երեքշաբթի օրը։
Նախագծում նախազգուշացվում է «արտաքին կախվածության» ռիսկի մասին՝ այն ենթակառուցվածքների և ծրագրային ապահովման մասով, որոնք անհրաժեշտ են ԱԲ հավելվածների մշակման և կառավարման համար։ Նշվում է, որ այդ կախվածությունները կարող են «օգտագործվել որպես զենք»՝ ինչպես պետական, այնպես էլ ոչ պետական դերակատարների կողմից՝ սպառնալիք ստեղծելով մատակարարման շղթաների համար։
Տագնապը ուժգնացել է Դոնալդ Թրամփի վերադարձից հետո՝ Եվրոպայում աճում է մտահոգությունը ամերիկյան տեխնոլոգիաներից կախվածության վերաբերյալ, և հնչում են թվային անկախության կոչեր։ Միաժամանակ Չինաստանը ակտիվորեն մարտահրավեր է նետում ԱՄՆ-ին ԱԲ ոլորտում, և ԵՄ-ն ռիսկի տակ է՝ զրկվելով այս տեխնոլոգիայի ապագա կիրառման վրա ազդեցությունից։
Չնայած Եվրոպայում հայտնվել են խոստումնալից ընկերություններ՝ ֆրանսիական Mistral-ը, գերմանական Helsing-ը և այլք, մայրցամաքը շարունակում է մեծապես կախված լինել ծրագրային ապահովման, սարքավորումների և հազվագյուտ հանքանյութերի մատակարարումից՝ ԱՄՆ-ից և Ասիայից։ Եվրահանձնաժողովը կոչ է անում պետական հաստատություններին աջակցել եվրոպական ստարտափներին՝ ձեռք բերելով տեղական open-source լուծումներ։
Եվրահանձնաժողովի ղեկավար Ուրսուլա ֆոն դեր Լայենի վկայությամբ, ԵՄ-ն ցանկանում է «արագացնել ԱԲ-ի ներդրումը բոլոր ոլորտներում»՝ դիտարկելով այն ոչ թե պարզապես արտադրողականության բարձրացման գործիք, այլ որպես ռազմավարական ակտիվ, որը սերտորեն կապված է Եվրոպայի արդյունաբերական, ինստիտուցիոնալ և պաշտպանական համակարգերի հետ։
Ծրագրի իրականացման համար նախատեսվում է ուղղել 1 միլիարդ եվրո՝ արդեն գոյություն ունեցող ֆոնդերից։ Առանձին ուշադրություն է դարձվելու ԱԲ-ի կիրառմանը պաշտպանության ոլորտում՝ հատկապես հրամանատարության և կառավարման (C2) համակարգերում, որտեղ եվրոպական բանակները դեռ կախված են ամերիկյան տեխնոլոգիաներից՝ ՆԱՏՕ-ի շրջանակում։ Բրյուսելը նաև մտադիր է աջակցել «ինքնիշխան մոդելների» ստեղծմանը՝ տիեզերական և պաշտպանական տեխնոլոգիաների համար։
