Պուտինի հետ հանդիպման քննադատություններից հետո Ուիտկոֆը սկսել է օգտվել Պետդեպի թարգմանիչների ծառայություններից. Politico
ԱՄՆ նախագահի հատուկ ներկայացուցիչ Սթիվ Ուիտկոֆը սկսել է ԱՄՆ Պետդեպարտամենտի թարգմանիչներին հրավիրել պաշտոնական բանակցությունների: Այս մասին հայտնել է Politico-ն՝ հղում անելով բարձրաստիճան պաշտոնյայի:
Հրապարակման համաձայն, որոշումը կայացվել է այն բանից հետո, երբ Ուիտկոֆը քննադատության է ենթարկվել օգոստոսի 6-ին Մոսկվայում Վլադիմիր Պուտինի հետ հանդիպման ժամանակ Կրեմլի թարգմանիչներ օգտագործելու համար: Արդյունքում, Վաշինգտոնը չի ստացել ռուսական կողմի առաջարկների ամբողջական ձայնագրությունը, ավելի վաղ գրել էր Reuters-ը:
NBC News-ը նշել է, որ արձանագրության խախտումներ տեղի են ունեցել նաև նախկինում. մայիսին հատուկ ներկայացուցիչը մի քանի անգամ հույսը դրել է Կրեմլի թարգմանիչների վրա: ԱՄՆ նախկին դեսպանները զգուշացրել են, որ նման պրակտիկան ռիսկեր է պարունակում. բանակցությունների որոշ մանրամասներ կարող էին բաց թողնվել կամ աղավաղվել:
Լրատվամիջոցների հաղորդագրությունների համաձայն, օգոստոսի 6-ի հանդիպումը տարվա սկզբից ի վեր Ուիտկոֆի արդեն հինգերորդ հանդիպումն էր Ռուսաստանի առաջնորդի հետ:
